Onkologiya jarrohligi yoʻnalishida xalqaro stajirovka dasturi uchun tanlovning suhbat bosqichi bo‘lib o‘tdi

Joriy yilning 19-fevral kuni Oʻzbekiston Respublikasi Prezidenti huzuridagi Davlat siyosati va boshqaruvi akademiyasida onkologiya jarrohligi yoʻnalishida xalqaro stajirovka dasturi uchun tanlovga hujjat topshirgan nomzodlar bilan suhbat o‘tkazildi.

Tanlov “El-yurt umidi” jamgʻarmasi tomonidan xorijiy tashkilotlar ishtirokida amalga oshiriladigan stajirovkalarni tashkil etish tartibi toʻgʻrisida Nizomga asosan Fransiyaning Oʻzbekistondagi elchixonasi bilan hamkorlikda amalga oshirilmoqda. 

Maʼlumot uchun: Tanlov g‘oliblari joriy yilning 9-martidan 10-apreliga qadar davom etadigan Fransiyaning Milliy jarrohlik akademiyasi tomonidan Parij va Strasburg shaharlarida tashkil etiladigan stajirovkada ishtirok etish imkoniyatini qo‘lga kiritadi.

Tanlov komissiyasi tomonidan o‘tkazilgan suhbat natijasiga ko‘ra, besh nafar nomzod stajirovka dasturida ishtirok etish uchun tavsiya etildi va ularning elektron pochta manzillariga elektron xabar yuborildi.

20-fevral kunidan boshlab Apellyatsiya komissiyasi o‘z faoliyatini boshlaydi. Murojaatlar besh ish kuni — 26-fevral soat 18:00 ga qadar “El-yurt umidi” jamgʻarmasining apellyatsiya@eyuf.uz elektron pochta manzili orqali qabul qilinadi.