Русский
English
Qadrli stipendiatlar! Aziz yoshlar!
Biz bilim, fikrlash moslashuvchanligi va xalqaro hamkorlik mamlakatlarning barqaror rivojlanishi va raqobatbardoshligining kalitiga aylanayotgan shiddatli oʻzgarishlar davrida yashamoqdamiz.
Soʻnggi yillarda Oʻzbekiston jadal transformatsiyalarni boshdan kechirmoqda. Iqtisodiy islohotlar, davlat boshqaruvi tizimini yangilash, raqamlashtirish, “yashil” kun tartibi — bu jarayonlarning barchasi yangi bilim, yangi malaka va yangicha qarashni talab etmoqda.
Aynan bugun dunyoning eng nufuzli universitetlarida tahsil olayotgan yoshlar bu oʻzgarishlarning asosiy harakatlantiruvchi kuchiga aylanmoqda. Sizning aqlingiz, gʻayratingiz, koʻnikmalaringiz — bu import qilib boʻlmaydigan asosiy resurs, uni faqat oʻzimiz yetishtira olamiz.
Boy tarix va ulkan salohiyatga ega Oʻzbekistonning bugungi kuni va kelajagi biz hozirdan nimaga sarmoya kiritayotganimizga bevosita bogʻliq. Biz qatʼiy ishonamizki, eng muhim investitsiya — bu insonga, uning aqliga, bilimiga, qobiliyatiga va oʻz kuchiga boʻlgan ishonchiga qilingan sarmoyadir.
Oʻzbekiston Respublikasi Prezidenti huzuridagi Istiqbolli kadrlarni tayyorlash boʻyicha “El-yurt umidi” jamgʻarmasi taraqqiyot vositasi, inson kapitaliga investitsiya kiritishning strategik platformasiga aylanmoqda.
Bizning asosiy vazifamiz — dunyoning nufuzli taʼlim va ilmiy markazlarida taʼlim olgan, Vatanga qaytib kelib, ilgʻor bilimlarni joriy etadigan, davlat institutlarini mustahkamlaydigan, sogʻliqni saqlash, taʼlim, iqtisodiyot, raqamlashtirish, madaniyat va jamiyat hayotining boshqa muhim sohalarini yangi bosqichga koʻtaradigan yangi avlod yetakchilari, mutaxassislar jamoasini shakllantirishdan iborat.
Yangi strategiya doirasida hududlardan kelgan yoshlarni, xotin-qizlarni, ilm-fan va davlat boshqaruvi sohasi vakillarini qoʻllab-quvvatlashga alohida eʼtibor qaratilmoqda, toki har bir isteʼdod egasi geografik joylashuvi yoki ijtimoiy mavqeyidan qatʼi nazar, oʻz ovozini eshittira olsin. Bu barqaror rivojlanishning global maqsadlariga, jumladan, “Hech kim ortda qolmasin” degan muhim tamoyilga mos keladi. Biz har bir kishi oʻzini oʻzgarishlarning, jamoaning, Oʻzbekistonning yangi tarixining bir qismi sifatida his qilishini istaymiz.
Xalqaro universitetlar, ilmiy va ekspert doiralari, xorijdagi davlat va xususiy tuzilmalar bilan hamkorlik “El-yurt umidi” jamgʻarmasini rivojlantirish strategiyasining muhim qismidir. Biz Oʻzbekiston dunyoda imkoniyatlar, muloqot, yoshlar tashabbuslari va intellektual kuch mamlakati sifatida tanilishini istaymiz.
Jamgʻarmaning kelgusi yillardagi asosiy vazifasi hamkorlik geografiyasini va mutaxassislar tayyorlashning ustuvor yoʻnalishlarini tizimli ravishda kengaytirishdan iborat. Tavsiya etilgan xorijiy oliy oʻquv yurtlari roʻyxatini akademik sifat, tadqiqot salohiyati va amaliyotga yoʻnaltirilgan dasturlar mavjudligiga eʼtibor qaratgan holda yangilashga alohida ahamiyat beriladi. Biz Top-100 talik universitetlar bilan hamkorlikni yoʻlga qoʻymoqdamiz.
“El-yurt umidi” jamgʻarmasi oʻz saʼy-harakatlarini Oʻzbekiston oliy taʼlim tizimini xalqaro standartlarga moslashtirishga faol koʻmaklashishga qaratmoqda. Scopus tizimida Xirsh indeksi (h-indeks) yuqori boʻlgan yetakchi xorijiy olimlar, professor-oʻqituvchilar va tadqiqotchilarni Oʻzbekiston universitetlari bilan hamkorlikka jalb qilish ustuvor yoʻnalishlarimizdan biri. Ular ixtisoslashtirilgan oʻquv kurslari va fanlarni oʻqitish, shuningdek, qoʻshma tadqiqot loyihalarida ishtirok etish uchun taklif etiladi.
Shu bilan birga, jamgʻarma mamlakatimiz oliy taʼlim muassasalariga QS (Quacquarelli Symonds) va THE (Times Higher Education) xalqaro agentliklarining global reytinglarida birinchi 300 talikka kirgan xorijiy universitetlar bilan qoʻshma taʼlim dasturlarini amalga oshirish bilan bogʻliq xarajatlarni moliyalashtirishda koʻmaklashadi. Bu Oʻzbekiston hududida xorijiy oliy taʼlim muassasalarining filiallarini ochishga koʻmaklashishni ham oʻz ichiga oladi.
Vazirlik va idoralar mutaxassislari uchun maqsadli stajirovkalarni, shu jumladan olti oygacha boʻlgan qisqa muddatli dasturlarni rivojlantirish ustuvor yoʻnalishlarimizdan biri. Bunday amaliyotlar xorijiy universitetlar, ilmiy-tadqiqot institutlari, xalqaro tashkilotlar va kompaniyalar bazasida tashkil etilib, boʻlajak rahbarlar va tahlilchilarga Oʻzbekistonning barqaror rivojlanish vazifalariga moslashtirilgan amaliy tajriba beradi.
“El-yurt umidi” jamgʻarmasi oʻzining uzoq muddatli strategiyasi doirasida Oʻzbekistonning davlat tuzilmalari va yetakchi xalqaro akademik hamda ilmiy institutlar oʻrtasidagi mustahkam aloqani taʼminlagan holda mintaqaviy darajadagi taʼlim va intellektual “hub”i sifatida shakllanishga intilmoqda. Bu nafaqat xorijiy hamkorlar bilan hamkorlik formatlarini kengaytirishni, balki kadrlar tayyorlash milliy tizimining global taʼlim makoniga chuqur integratsiyalashuvini ham nazarda tutadi.
Mintaqaning iqtidorli yoshlariga davlat stipendiyalarini taqdim etish Oʻzbekistonning mintaqaviy taʼlim markazi sifatidagi xalqaro rolini mustahkamlash, madaniy almashinuvni ragʻbatlantirish, qoʻshma tadqiqot tashabbuslarini rivojlantirish va uzoq muddatli sheriklikni shakllantirish imkonini beradi.
Bugun mamlakatimiz “Oʻzbekiston — 2030” strategiyasini amalga oshirayotgan bir paytda, xorijda taʼlim olishga eʼtibor qaratish hashamat emas, balki zaruratga aylanmoqda. Zero, faqat shu yoʻl bilangina dunyoga moslashibgina qolmay, uni shakllantiradigan mutaxassislarni tarbiyalash mumkin.
“El-yurt umidi” jamgʻarmasi faqat iqtidorli yoshlarni qoʻllab-quvvatlash dasturi emas. Bu Davlatimiz rahbarining Oʻzbekiston kelajagini jahon darajasidagi bilim va tajriba bilan qurollangan yoshlar qurishiga qaratilgan strategik loyihasidir.
Ishonamizki, yosh oʻzbekistonliklar shunchaki bilim tashuvchilar emas, balki oʻzgarishlar agentlari, transformatsiyalarning harakatlantiruvchi kuchidir. Sizlar bilimlar iqtisodiyotini yaratadigan, adolatli va barqaror jamiyat quradigan, rahbarlarning yangi avlodisiz. Va bizning jamoamiz bu yoʻlda sizlar bilan yonma-yon boʻlib, sizlarni yoʻnaltiradi va qoʻllab-quvvatlaydi.
Aziz yoshlar, dunyo sizlarning oldingizda ochiq. Oʻqing, ijod qiling, izlaning. Ilmiy yoki kasbiy faoliyatingizdagi har bir qadamingiz Vatan ravnaqi va uning jahon hamjamiyatidagi ishonchli oʻrni sari qoʻyilgan qadam boʻlsin!
Gulnoza Ismailova,
O‘zbekiston Respublikasi Prezidenti huzuridagi Istiqbolli kadrlarni tayyorlash bo‘yicha
"El-yurt umidi" jamg‘armasi ijrochi direktori