“Эл-юрт умиди” жамғармаси ва Буюк Британиянинг Бристол университети ҳамда “Kaplan International Pathways” ташкилотилари билан янада яқинроқ ҳамкорлик алоқалари ўрнатилмоқда!

Жорий йилнинг 20 июнь куни “Эл-юрт умиди” жамғармасида ижрочи директор ўринбосари в.б. Ж. Aхмедов, Ўзбекистоннинг Буюк Британиядаги элчихонаси ҳамда “Kaplan International Pathways” ташкилоти бошқарув директори Линда Кован ва ташкилот раҳбарияти ўртасида ўзаро алоқаларни янада мустаҳкамлашга қаратилган икки томонлама меморандум имзоланган эди.

Мазкур меморандумга мувофиқ, “Kaplan International Pathways” ташкилоти кўмагида Буюк Британия, Австралия, Янги Зелландия ва АҚШ каби ривожланган давлатларда ўқийдиган “Эл-юрт умиди” жамғармасининг бакалавриат дастури бўйича бир йиллик тайёрлов курслари (Foundation Year)да ўқийдиган стипендиатлари учун алоҳида ўқиш харажатларидан 25 фоизига қадар чегирмалар ажратилишга эришилган.

Жамғарма “Kaplan International Pathways” ташкилоти кўмагида вазирлик ва идораларнинг мақсадли буюртмаси асосида давлат хизматчиларини қисқа муддатли малака ошириш ва стажировка ўтишини ҳамкорликда ташкил қилишга доир келишувга ҳам эришган эди.

2023 йилнинг 17 ноябрь куни “Эл-юрт умиди” жамғармасида Жамғарма ижрочи директор ўринбосари в.б. Ж.Ахмедов, А.Аъзамхонов ва Г.Шамсиддиновалар ҳамда Буюк Британиянинг Бристол университети Халқаро талабалар билан ишлаш бўйича мутахассиси Хиаожие Янг ҳамда  Каплан Халқаро ташкилоти Халқаро ишга қабул қилиш бўйича директор Лилия Гаисина ўртасида учрашув бўлиб ўтди.

Маълумот учун: “Kaplan International Pathways” ташкилоти 1938 йил АҚШ да ташкил қилинган бўлиб, 2005 йилдан бошлаб Буюк Британиянинг Лондон шаҳрида фаолият юритиб келмоқда. Халқаро ташкилотнинг дунё рейтингида энг юқори ўринларни эгаллаган Буюк Британия, Австралия ва Янги Зелландия АҚШ каби ривожланган давлатлардаги 20 дан ортиқ университетларда бакалавриат дастури бўйича бир йиллик тайёрлов курслари (Foundation Year)да ўқишини ташкил этиб келмоқда.

Бристол университети Буюк Британиянинг нуфузли университетларидан бири бўлиб, 1909 йилда ташкил этилган. Бристол университетида QS рейтингида 61 ўринда туради. Мазкур университетда муҳандислик иши, қишлоқ хўжалиги ва ветеринария, фармацевтика, тиббиёт йўналишлари бўйича халқаро рейтингларда юқори ўринларда туради.

Учрашув давомида, Ж.Ахмедов томонидан Жамғарманинг жорий йилги 2-стипендия танлови ҳақида батафсил маълумот берилди. Шунингдек, ҳозирги кунда Бристол университетида таълим олаётган 5 нафар Жамғарма стипендиатларини ўқиш ва яшаш шароитларини янада яхшилаш учун университет томонидан қўшимча имтиёзлар бериш юзасидан таклифлар киритди ва университет вакили мазкур масалада университет ҳар томонлама қўллаб қувватлаш чораларини кўраётганини маълум қилди.

Шу билан бирга, Ж.Ахмедов Бристол университети билан онлайн мулоқотлар давомида Жамғарма стипендиатларини ўқиш харажатларидан чегирмалар ажратиш юзасидан киритилган таклифларга университет раҳбариятини фикрини сўради, университет вакили ҳар бир Жамғарма стипендиатининг ўқиш харажатларидан 15% миқдорида чегирма ажратиш бўйича университет қарор қабул қилганлигини маълум қилди.

Шунингдек, Хиаожие Янг томонидан Буюк Британия визасига янги қоида киритилганини, Жамғарманинг таклифига кўра, фақат магистратура тадқиқот ва докторантура таълим дастурлари учун стипендиатларга ўз оиласини олиб кетиш учун яқиндан ёрдам беришини таъкидлади.

Бундан ташқари, учрашув сўнгида “Kaplan International Pathways” ташкилоти ҳамкорлик қилаётган Канаданинг Виктория университети билан Жамғарма ўртасида ҳамкорлик алоқаларини истиқболини белгиловчи 3 томонлама меморандум имзолашга келишиб олинди.

Мулоқот сўнгида, томонлар Жамғарма Бристол университети билан ҳамкорлик алоқаларини истиқболини белгиловчи, юқоридаги таклифларни ўз ичига олган икки томонлама меморандум шу йилнинг охирига қадар онлайн имзолашга келишиб олдилар!