Ассалому алайкум ҳурматли стипендиатлар Жамғармамиз оиласи аъзолари! Давлатимиз раҳбарининг шахсан ташаббуслари билан ташкил этилган “Эл-юрт умиди” жамғармаси бугун 5 ёшга тўлди!!!

Ёш авлоднинг орзу-мақсадларига қанот бўлиб, уларнинг эзгу тилак ва истакларини рўёбга чиқаришда ҳар томонлама маслаҳатчи ва кўмакчи бўлиб келаётган “Эл-юрт умиди” жамғармаси 2018 йил 25 сентябрда ташкил этилган.

Бугун сарҳисоб қилсак, Жамғарма ўз олдига қўйган вазифаларни ситқидилдан бажариб келмоқда. Жамғарма томонидан беш йил давомида 1781 нафар стипендиатларни 45 га яқин давлатларда, жумладан, АҚШ, Буюк Британия, Германия, Франсия, Япония, Канада, Италия, Испания, Жанубий Корея, Хитой, Россия каби мамлакатларнинг 320 дан зиёд университетлари, илмий марказлари ва нуфузли муассасаларида таҳсил олишини ташкил этиб келмоқда. 

Айни вақтда хорижий давлатларнинг нуфузли университетларида жами 504 нафар Жамғарма стипендиатлари, жумладан, бакалавриат дастурида 251 нафар, магистратурада 162 нафар ва докторантура дастурида 91 нафари таълим олишини давом эттирмоқда.  

Бугунги кунда Жамғарманинг 1277 нафар стипендиатлари хорижда замонавий билим-кўникмаларни эгаллаб, мамлакатимизга қайтиб, Ўзбекистон иқтисодиётининг турли соҳаларида самарали илмий-педагогик ҳамда амалий фаолият олиб бормоқдалар.

“Эл-юрт умиди” жамғармасининг беш йиллиги муносабати билан, Ватан равнақи йўлида, Ўзбекистонни халқаро рейтингларда ўз муносиб ўрнини эгаллашида, яқин йилларда уни ривожланган мамлакатлар қаторига киришида бор куч-ғайратларини, имконият ва билим-салоҳиятларини сафарбар этаётган ва этишга тайёр бўлган Жамғармамиз оиласи аъзолари бўлмиш Сиз азиз стипендиатларимизни 5 ёшга тўлганлигимиз муносабати билан чин қалбдан жамоамиз номидан табриклайман! Барчангизга мустаҳкам соғлиқ, оилавий хотиржамлик, ўқиш ва ишларингизда улкан зафарлар тилайман! Ишонаманки барчангиз халқимиз ва давлатимиз раҳбари Сизларга билдирган ишончларини албатта оқлайсизлар.