2023 йил 24 август куни Ўзбекистон Республикаси Президенти ҳузуридаги Давлат бошқаруви академияси ва “Эл-юрт умиди” жамғармаси раҳбарияти АҚШнинг Ўзбекистондаги Элчиси Джонатан Хеник бошчилигидаги элчихона вакиллари билан учрашув ўтказди.

Учрашувда Академия ректори А.Ш.Бекмуродов томонидан Ўзбекистон Республикаси Президенти Ш.М.Мирзиёевнинг АҚШ билан икки томонлама алоқаларни янада кенгайтириш ва ривожлантиришга берилаётган алоҳида эътибори, шунингдек, мамлакатда олиб борилаётган иқтисодиёт ва давлат бошқарувини ислоҳ қилиш борасида эришилган натижалар тўғрисида атрофлича маълумотлар берилди.

Академия ректори Жамғарманинг АҚШ элчихонаси билан таълим соҳасидаги ўзаро ҳамкорликда қилинаётган саъй-ҳаракатлари учун миннатдорчилик билдирди. Шу билан бирга, элчи Дж. Хеник Ўзбекистонда амалга оширилаётган маъмурий ислоҳотлар, Академия ва Жамғарманинг таълим дастурлари бўйича амалга оширилган чора-тадбирларига юқори баҳо бериб ўтди.

Учрашувда “Эл-юрт умиди” жамғармаси ва АҚШнинг “Fullbright” дастури ўртасида ҳамкорликдаги қўшма таълим дастурини ташкил этиш, шунингдек, Давлат бошқаруви академияси АҚШнинг нуфузли Сиракуз Университети Максвелл давлат бошқаруви мактаби билан давлат хизматчилари учун қисқа ва узоқ муддатли қўшма таълим ва стажировка дастурларини ҳамкорликда ташкил этиш таклифи муҳокама қилинди.

АҚШ элчиси Дж.Хеник жаноблари мазкур таклифларни ҳар томонлама қўллаб-қувватлашга тайёрлигини маълум қилди.