“Эл-юрт умиди” жамғармаси ва Буюк Британиянинг нуфузли Глазго университети ўртасида ҳамкорлик алоқалари ўрнатилди!

Жорий йилнинг 9 август куни “Эл-юрт умиди” жамғармаси ижрочи директор ўринбосари в.б. Ж. Ахмедов, Бўлими бошлиқлари А. Хамдамов ва А. Аъзамхонов, Британиянинг нуфузли Глазго университети Халқаро талабалар қабули бўйича директори Адри Ҳортобаги ва Халқаро талабалар қабули бўйича менежери Бил Ҳоарилар ўртасида ZOOM платформаси орқали учрашув бўлиб ўтди.

Маълумот учун: Глазго университети Шотландиядаги давлат тадқиқот университетидир. Университетга 1451 йилда асос солинган. Мазкур университет инглиз тилида сўзлашувчи дунёда тўртинчи энг қадимги университет ва Шотландиянинг тўртта қадимий университетларидан бири. Мазкур университет халқаро тан олинган рейтингларда жумладан, QS-81 ўринни эгаллаган, Сент-Ендрюс, Aбердин ва Единбург университетлари билан бир қаторда университет 18-асрда Шотландия маърифатининг бир қисми бўлган.

Университетнинг 2021–2022 йиллардаги йиллик даромади 923,6 миллион фунт стерлингни ташкил этган, шундан 196,1 миллион фунт стерлинг тадқиқот грантлари ва шартномалар ҳисобидан. Университет Буюк Британиядаги барча университетлар орасида олтинчи энг катта жамғармага эга ҳисобланади. Russell Group ва Европа тадқиқот университетлари аъзоси.

Мазкур учрашувда ўзаро ҳамкорлик алоқаларини ўрнатиш ва Жамғарма стипендиатларини ушбу университетда таълим олишида кўмаклашиш бўйича таклифлар муҳокама қилинди.

Шунингдек, Жамғарма стипендия танловида иштирок этиш истагида бўлган номзодлари учун университетда ўқиш имкониятлари, ҳужжат топшириш жараёнлари бўйича онлайн вебинар ташкил этишга келишиб олинди.

Учрашув давомида Ж. Ахмедов томонидан нуфузли университетда Жамғарма стипендиатларини таълим олиши учун чегирмалар ажратиш юзасидан таклиф киритди ҳамда университет вакиллари бу таклифни қўллаб қувватлаб, ҳар бир Жамғарма стипендиатининг ўқиш харажатлари учун 20 фоиз миқдорида чегирма ажратиш бўйича келишувга эришилди.

Мазкур учрашув якунида жорий йилнинг август ойи охирга қадар ҳамкорлик алоқаларининг истиқболларини белгиловчи, юқоридаги таклифларни ўз ичига олган меморандум имзолашга келишиб олинди.