Prezident Administratsiyasi Kommunikatsiyalar departamenti boshlig‘i o‘rinbosari – O‘zbekiston Respublikasi Prezidenti Xalq qabulxonasi boshligʻi bilan uchrashuv boʻlib oʻtdi

“El-yurt umidi” jamgʻarmasi ijrochi direktori Gulnoza Ismailova va O‘zbekiston Respublikasi Prezidenti Administratsiyasi Kommunikatsiyalar departamenti boshlig‘i o‘rinbosari – O‘zbekiston Respublikasi Prezidenti Xalq qabulxonasi boshligʻi Farruh Omonov oʻrtasida uchrashuv boʻlib oʻtdi.

Tomonlar fuqarolar murojaatlari bilan ishlash samaradorligini oshirish, davlat kommunikatsiyalari tizimini modernizatsiya qilish va kadrlar salohiyatini mustahkamlashga qaratilgan hamkorlikni yanada rivojlantirish masalalarini muhokama qildilar.

Fuqarolar murojaatlarini tahlil qilish, jamoatchilik fikri, aholi ehtiyojlarini chuqurroq anglash uchun sotsiologik tadqiqotlar oʻtkazish, bu jarayonlarga zamonaviy texnologiyalar va tahliliy vositalarni, jumladan, sunʼiy intellektni joriy etish, bu soha uchun kadrlar tayyorlash hamda mutaxassislarning malakasini oshirishga alohida urgʻu berildi.

“El-yurt umidi” jamgʻarmasi stipendiatlarini Xalq qabulxonasi tizimidagi amaliy faoliyatga jalb etish, yosh mutaxassislar uchun maqsadli stajirovkalar tashkil etish kabi tashabbuslar koʻrib chiqildi.

Uchrashuv yakunida tomonlar amaliy hamkorlikni chuqurlashtirish, qoʻshma loyihalarni amalga oshirishga tayyorligini bildirdilar.