Tanlov komissiyasi yoshlarning ishtirok etish imkoniyatlarini kengaytirish toʻgʻrisida qaror qabul qildi

Bugun “El-yurt umidi” jamgʻarmasining 2026-yil 1-ochiq stipendiya tanlovi komissiyasi tomonidan yoshlarning dasturda ishtirok etish imkoniyatini kengaytirishga qaratilgan qaror qabul qilindi.

Komissiya tanlovda quyidagilarning ishtirok etishiga ruxsat berishni maʼqulladi:

bakalavriat yoʻnalishi boʻyicha:

– umumtaʼlim maktablarining bitiruvchi sinf oʻquvchilari;

– oʻrta maxsus va professional taʼlim muassasalari bitiruvchi-oʻquvchilari (talabalari);

magistratura yoʻnalishi boʻyicha:

– oliy taʼlim muassasalarining bitiruvchilari.

Shu munosabat bilan, ularda attestat yoki diplom oʻrniga oʻqish joyidan maʼlumotnoma hamda 2025/2026-oʻquv yili uchun baholaridan koʻchirmasini (“transkriptini”) onlayn platformaga yuklash imkoniyati yaratiladi. Ushbu chora yoshlarni qoʻllab-quvvatlash, ularning imkoniyatlarini kengaytirish hamda iqtidorli nomzodlarning salohiyatini roʻyobga chiqarishga qaratilgan.

MUHIM: ushbu qaror nomzodlar Tanlov toʻgʻrisidagi nizomda belgilangan barcha boshqa talablarga javob bergan taqdirdagina qoʻllaniladi.

Tanlov komissiyasi hujjatlarga qoʻyiladigan talablarga alohida eʼtibor qaratadi:

– maʼlumotnomalar taʼlim muassasasining rasmiy blankasida rasmiylashtirilishi;

– muassasa rahbariyati tomonidan imzolanishi (elektron raqamli imzo mavjud boʻlganda — ERI bilan tasdiqlanishi);

–  amaldagi sanalar va ishonchli maʼlumotlarni oʻz ichiga olishi shart.

Murojaatlar uchun: @eyufadmissionbot Telegram boti