Yoshlar ishlari agentligi bilan istiqbolli rejalar belgilab olindi

“El-yurt umidi” jamgʻarmasi ijrochi direktori Gulnoza Ismailova Yoshlar ishlari agentligi direktori Alisher Saʼdullayev bilan uchrashdi.

Muloqot davomida ikki tashkilot oʻrtasidagi hamkorlikni yangi bosqichga olib chiqish masalalari atroflicha muhokama qilindi. Xususan, yangi avlod liderlarini tayyorlash, davlat va nodavlat tashkilotlarida faoliyat yuritayotgan stipendiatlar salohiyatidan samarali foydalanish hamda stipendiatlar safini yanada kengaytirish boʻyicha istiqbolli rejalar belgilab olindi.

“El-yurt umidi” jamgʻarmasi tomonidan yaratilgan yagona axborot portali imkoniyatlari hamda yoshlarni qoʻllab-quvvatlashga qaratilgan loyihalar taqdimot qilindi. Taʼkidlangandek, bugungi kunda jamgʻarmaning hamkorlar tarmogʻi 50 dan ortiq yetakchi xorijiy universitetlar, xalqaro tashkilotlar va ilmiy markazlarni oʻz ichiga oladi. 

Jamgʻarmaning uzoq muddatli maqsadi qoʻshma taʼlim, tadqiqot va innovatsion loyihalarni amalga oshirib, xorijda nufuzli universitetlarni tamomlagan istiqbolli mutaxassislarni birlashtiruvchi va ularning davlat boshqaruvi tizimi hamda milliy iqtisodiyotga samarali integratsiyasini taʼminlovchi Global Uzbekistan Talent Hubʼni yaratishdan iborat.

Shu bilan birga, jamgʻarma vakillariga yoshlar uchun agentlik binosida yaratilgan zamonaviy sharoitlar hamda amalga oshirilayotgan yirik loyihalar tanishtirildi.