Русский
English
Bugun, 28-noyabr kuni Oʻzbekiston Milliy matbuot markazida ushbu mavzuda matbuot anjumani o‘tkazildi. Tadbir doirasida “El-yurt umidi” jamgʻarmasi ijrochi direktorining birinchi oʻrinbosari Davron Abdurashidov, ijrochi direktor oʻrinbosari Shuxrat Daminov hamda bosh yuriskonsult Yorbek Siddiqovlar ishtirok etib, OAV vakillarining savollariga javob berdi.
Ta’kidlangandek, joriy yilning noyabr oyida Oʻzbekiston Respublikasi Prezidenti huzuridagi Istiqbolli kadrlarni tayyorlash boʻyicha “El-yurt umidi” jamgʻarmasi “El-yurt umidi” stipendiyasi uchun ikkinchi ochiq tanlovini eʼlon qildi. Tanlov joriy yilning 5-may kuni qabul qilingan Oʻzbekiston Respublikasi Prezidentning Farmoni va ushbu hujjat bilan tasdiqlagan tanlov nizomi asosida yangilangan meʼyor va talablar boʻyicha oʻtkaziladi.
Xususan, test va suhbat bosqichlari uchun oʻtish bali 61 ball etib belgilandi. Magistratura va doktorantura yoʻnalishlariga kirmoqchi boʻlgan nomzodlar uchun rasmiy ish staji — magistratura uchun kamida 1 yil, doktorantura uchun esa kamida 2 yil boʻlishi shart qilib qoʻyildi.
Bundan tashqari, xalqaro imtihon tizimlari boʻyicha amaldagi sertifikatiga ega boʻlgan nomzodlar uchun imtiyoz mavjud. Ular test sinovlaridan ozod etilib, toʻgʻridan-toʻgʻri suhbat bosqichiga oʻtkaziladi. Biroq, bunday holda ular quyidagi koʻrsatkichlarga ega boʻlishi lozim:
- Graduate Management Admission Test (GMAT) (imtihon natijalari (Verbal/Quantative) boʻyicha nisbat koʻrsatkichi (percentile) 75 va undan yuqori boʻlganda);
- Graduate Record Examinations (GRE) (imtihon natijalarining har biri (Verbal, Quantative, Writing) boʻyicha nisbat koʻrsatkichi (percentile) 75 va undan yuqori boʻlganda);
- Scholastic Assessment Test (SAT) (1300 ball va undan yuqori boʻlganda);
- xalqaro darajadagi A-Level (Cambridge Assessment General Certificate of Education) (fanlar boʻyicha A (a) darajadan past boʻlmagan).
Ikkinchi ochiq tanlov doirasida 12 – 26 noyabr kunlari hujjatlarni qabul qilish faqatgina ONE ID milliy raqamli identifikatsiya tizimi bilan integratsiya qilingan onlayn platforma orqali amalga oshirildi. Bu maʼlumotlarning avtomatik tekshiruvini taʼminlaydi va dastlabki bosqichlarda subyektiv omilni bartaraf etadi, shuningdek, koʻproq nomzodlarga poytaxtga kelmasdan ariza topshirish imkoniyatini beradi. Bu imkoniyat nafaqat Oʻzbekistondan, balki dunyoning istalgan boshqa mamlakatidan ham foydalanish mumkin.
Hujjatlarni qabul qilish davrida platformada 6000 dan ortiq foydalanuvchi roʻyxatdan oʻtdi, bu esa jamoatchilik orasida katta qiziqish uygʻonganini koʻrsatadi.
Hujjatlar topshirganlarning 60%i bakalavr, 40%i magistratura va doktorantura taʼlim yoʻnalishi boʻyicha dunyoning Top-300 talik universitetlaridan qabul xatlari olgan.
Nomzodlar 21 ta davlatdagi universitetlardan qabul xatlarini olgan. Top-5 talik davlatlar qatorida — Buyuk Britaniya, AQSH, Avstraliya, Italiya va Janubiy Koreya.
Tizim arizalarni dastlabki saralashni amalga oshiradi, belgilangan talablarga javob bermaydiganlarini avtomatik ravishda ajratib tashlaydi. Ariza topshirishning har bir bosqichi batafsil bayon etilgan boʻlib, bu jarayonni barcha ishtirokchilar uchun nihoyatda tushunarli qiladi.
Tanlovning yangi tizimi asosiy tamoyilni taʼkidlaydi: barcha ishtirokchilar mutlaqo teng sharoitda boʻladi va muvaffaqiyatning ustuvor omili bilim, tahliliy qobiliyatlar va kasbiy malakalardir.
Raqamlashtirish, yagona talablar, yagona chegara va standartlashtirilgan baholash mezonlari “noaniq holatlar”ni bartaraf etadi va tanlovni toʻlaqonli merit-based (bilim va ko‘nikmalarga asoslangan) mexanizmga aylantiradi.
2-ochiq stipendiya tanlovi uchun 277 ta kvota ajratilgan boʻlib, ular quyidagicha taqsimlangan: 105 — bakalavriat, 122 — magistratura, 50 — doktorantura.
Bu davlatning turli darajadagi mutaxassislarni — boʻlajak tadqiqotchilardan tortib boshqaruv va ilmiy tuzilmalar uchun kadrlargacha tayyorlashga boʻlgan strategik eʼtiborini aks ettiradi.
Dasturga qiziqish ortib borayotgan bir paytda, jamgʻarma “konsalting agentliklari” va “kafolatlangan gʻalaba” vaʼda qiluvchi shaxslar tuzogʻiga tushgan ota-onalar va ishtirokchilarning murojaatlarini qayd etmoqda.
Shu munosabat bilan Jamgʻarma vakillari quyidagilarni alohida taʼkidladi:
- tanlovda ishtirok etish uchun hech qanday vositachilar kerak emas;
- jarayon toʻliq shaffof, bosqichma-bosqich tavsiflangan va hamma uchun ochiq;
- “maxfiy sxemalar” va “ichki yoʻllar” umuman mavjud emas — algoritm va aniq mezonlar hamma narsani hal qiladi;
- mustaqil tayyorgarlik — eng toʻgʻri yoʻl: tanlangan mutaxassislikni chuqur oʻrganish, Oʻzbekiston va xorijdagi mavjud imkoniyatlarni tushunish, test spetsifikatsiyasi va tavsiya etilgan adabiyotlar bilan tanishish kifoya.
Ma’lumot uchun, “El-yurt umidi” jamgʻarmasi 2025-yil 1-ochiq stipendiya tanlovi natijasiga koʻra, 173 nafar nomzod “Oʻzbekiston Respublikasi Prezidentining “El-yurt umidi” stipendiyasi sovrindori” deb eʼtirof etildi. Ularning 70 foizi jahonning TOP – 100 roʻyxatidagi universitetlarga kirgan yoshlardir. Bu stipendiatlarning sifat jihatidan yangi tarkibi. Qatʼiyat bilan mehnat qilib, oʻz ustida ishlab, dunyoning eng yaxshi universitetlari — Kembrij, Pensilvaniya, Seul milliy universiteti, Nyu-York, London, Gonkong, Dyuk universitetlari kabi nufuzli oliy oʻquv yurtlariga kirishga muvaffaq boʻlganlar qoʻllab-quvvatladi.
Bu ishtirokchilarni tayyorlashning sifat jihatidan yangi darajasini aks ettiradi va islohotlar bilan mustahkamlangan xizmat asosidagi yondashuvning samaradorligini koʻrsatadi.
“El-yurt umidi” jamgʻarmasi
Jamoatchilik bilan aloqalar va axborot xizmati