Fransiya elchisi bilan fan, taʼlim va davlat xizmatchilarining malakasini oshirish yoʻnalishlarida hamkorlik istiqbollari muhokama qilindi

“El-yurt umidi” jamgʻarmasi ijrochi direktori Gulnoza Ismailova Fransiyaning Oʻzbekistondagi elchisi Ualid Fuk bilan uchrashdi. Maqsad — ikki mamlakat oʻrtasidagi taʼlim va ilmiy aloqalarni rivojlantirish, yoshlar taʼlim geografiyasini kengaytirish, madaniy-gumanitar hamkorlikni mustahkamlash masalalarini muhokama qilishdir.

Tomonlar ikki davlat olimlari va tadqiqotchilari oʻrtasida muntazam almashinuv dasturlari tizimini yoʻlga qoʻyishga oʻzaro qiziqish bildirdilar. Oʻzbekiston oliy taʼlim muassasalari bilan akademik almashinuv va qoʻshma tadqiqotlar dasturlarini amalga oshirish uchun Fransiyaning fan va muhandislik sohasida ixtisoslashgan universitetlari professorlari hamda tadqiqotchilari delegatsiyasining tashrifi muhokama etildi.

Davlat xizmatchilariga fransuz tilini oʻrgatish va ularning keyinchalik Fransiyada stajirovka oʻtashlari uchun Alliance Française bilan hamkorlikda ish olib borish rejalashtirilmoqda. Fransiyaning yetakchi tibbiyot universitetlari bilan hamkorlikni yoʻlga qoʻyish, sogʻliqni saqlash sohasida oʻzbekistonlik mutaxassislarning maqsadli stajirovkalarini tashkil etish boʻyicha kelishuvga erishildi.

Fransiyaning Sharq tillari va sivilizatsiyalari milliy institutida (INALCO) oʻzbek tili, tarixi va madaniyati kurslarini joriy etish loyihasiga alohida eʼtibor qaratildi.

Uchrashuv yakunida taʼkidlanishicha, taʼlim, fan va madaniyat sohalaridagi hamkorlikni mustahkamlash Oʻzbekiston yoshlari va mutaxassislari uchun yangi imkoniyatlar yaratish bilan bir qatorda Oʻzbekiston — Fransiya munosabatlarining uzoq muddatli rivojlanishiga ham muhim hissa qoʻshadi.