“El-yurt umidi” jamgʻarmasi va Stenford universiteti qoshidagi “Silk Road” innovatsion birlashmasi bilan hamkorlik qiladi

2025-yil 23-sentyabr kuni Nyu-Yorkda “El-yurt umidi” jamgʻarmasi ijrochi direktori Gulnoza Ismailova Stenford universiteti qoshidagi “Silk Road” innovatsion birlashmasi ijrochi direktori va hammuassisi Asset Abdualiyev bilan uchrashdi.

Muzokaralar davomida tomonlar quyidagi yoʻnalishlarda hamkorlik istiqbollarini muhokama qildi:
- oʻzbekistonlik yosh startapchilar va raqamli texnologiyalar boʻyicha mutaxassislarning Stenford universitetining taʼlim va tadqiqot tashabbuslarida ishtirokini kengaytirish;
- Oʻzbekiston yoshlari tomonidan IT sohasida amalga oshirilayotgan loyihalarni jahon miqyosida ilgari surish va amalga oshirish;
- raqamlashtirish va axborot texnologiyalari sohasida faoliyat yuritayotgan yosh davlat xizmatchilari uchun Silikon vodiysining yetakchi kompaniyalarida stajirovka oʻtash imkoniyatini yaratish.

Uchrashuv yakunida sheriklikni yanada chuqurlashtirish uchun asos boʻladigan oʻzaro anglashuv memorandumi imzolandi.

Bunday hamkorlik Oʻzbekistonda IT va raqamli texnologiyalar sohasida yuqori malakali kadrlarni tayyorlash, Gʻarb tajribasini joriy etish va oʻzbekistonlik mutaxassislarning Silikon vodiysidagi ishtirokini kengaytirishga xizmat qilishi kutilmoqda.

Maʼlumot uchun: “Silk Road” — bu Silikon vodiysida joylashgan, startaplarni qoʻllab-quvvatlash va moliyalashtirishga ixtisoslashgan, shuningdek, ularni AQSH hududida amalga oshirish mexanizmlarini ishlab chiqishga koʻmaklashadigan tashkilotdir.