Русский
English
“El-yurt umidi” jamgʻarmasi ijrochi direktori Gulnoza Ismailova BMT Bosh Assambleyasining Yoshlar masalasiga oid Butunjahon harakat dasturi 30-yilligiga bagʻishlangan sessiyada nutq soʻzladi.
Taʼkidlangandek, bugun dunyo yangi Uygʻonish davri ostonasida turganini yana bir bor his qilmoqdamiz. Biroq oʻtmishdagidan farqli oʻlaroq, bu Renessans global — boʻlinishga emas, balki saʼy-harakatlarni birlashtirishga asoslangan. Va bu jarayonlarning barchasining markazida asosiy resurs inson boʻlib qolmoqda — uning aql-zakovati, gʻayrati va bilimga boʻlgan intilishi.
“Oʻzbekistonda inson kapitaliga sarmoyalarsiz mamlakatimiz va mintaqamiz kelajagi boʻlishi mumkin emasligini tan olamiz. Prezident Shavkat Mirziyoyev rahbarligida Oʻzbekiston ushbu resursga ustuvor ahamiyat berib, taʼlim va kasbiy tayyorgarlik strategik investitsiya hisoblanadigan tizimni barpo etilmoqda”, — dedi G.Ismailova.
Soʻnggi sakkiz yilda Oʻzbekistonda maktabgacha taʼlim qamrovi 27 foizdan 78 foizga yetdi. Oliy taʼlim bilan qamrov 9 foizdan 42 foizga koʻtarildi. Magistraturada oʻqiyotgan talabalar soni atigi sakkiz yil ichida 7 barobar, ayollar orasida esa 11 barobar koʻpaydi. Davlat xotin-qizlarning taʼlimini oʻqish toʻlovlarini qoplash orqali moliyalashtirishni davom ettirmoqda, bu esa oliy taʼlimni har qachongidan ham qulayroq qilmoqda.
Bundan tashqari, 1991-yildan 2016-yilgacha boʻlgan 25-yil ichida davlat koʻmagida chet elda atigi 800 nafar talaba tahsil olgan boʻlsa, 2018-2025-yillar oraligʻida bu koʻrsatkich deyarli uch barobarga oshdi. Oʻzbekiston Respublikasi Prezidenti huzuridagi “El-yurt umidi” istiqbolli kadrlarni tayyorlash jamgʻarmasi tufayli 2 ming 300 nafardan ziyod talaba ana shunday imkoniyatga ega boʻldi. Va dastur kengayishda davom etmoqda.
“El-yurt umidi” jamgʻarmasining asosiy missiyasi — dunyoning nufuzli taʼlim va ilmiy markazlarida tahsil olgan va ilgʻor bilimlarni oʻzlashtirgan yoshlarni davlat institutlarini mustahkamlash, sogʻliqni saqlash, taʼlim, iqtisodiyot, raqamlashtirish, madaniyat va boshqa muhim sohalarni yangi bosqichga koʻtarish uchun keng jalb qilish, oʻz Vataniga qaytib, Yangi Oʻzbekistonni barpo etishga hissa qoʻshadigan yetakchilarning yangi avlodi — yuqori malakali mutaxassislar jamoasini shakllantirishdan iborat.
Oʻzbekistonning yondashuvi global tendensiyani aks ettiradi: bugungi kunda yoshlar nafaqat islohotlar obyekti, balki iqlim muammolaridan tortib raqamli diplomatiyagacha boʻlgan xalqaro kun tartibini shakllantirishning faol ishtirokchilari sifatida qaralmoqda.
“Yoshlar — bu nafaqat kelajak, balki bugungi kundir. Bugungi kunda sayyoramizda 1,8 milliard yosh avlod — insoniyat tarixidagi eng katta avlod yashamoqda. Hukumatlarning siyosiy masʼuliyati bu imkoniyatni qoʻldan boy bermaslikdir. Taʼlim va intellektga sarmoya kiritish taraqqiyotning yagona barqaror yoʻlidir”, – dedi jamgʻarmaning ijrochi direktori.
Oʻzbekiston bu borada birinchi qadamni qoʻydi. Kuni kecha Prezident Shavkat Mirziyoyev BMT Bosh Assambleyasining 80-sessiyasida aynan shu binoda “Jahon yoshlarning tinchlik sari harakati”ni taʼsis etish va uning qarorgohini Oʻzbekistonda joylashtirish taklifini ilgari surdi.
Gulnoza Ismailova yoshlar ongiga tinchlik, insonparvarlik va doʻstlik, oʻzaro ishonch va hurmat kabi ezgu gʻoyalarni singdirishga qaratilgan ushbu tashabbusni qoʻllab-quvvatlashga chaqirdi.