“El-yurt umidi” jamgʻarmasi va Xalqaro taʼlim instituti hamkorlik qilishga kelishdi

Joriy yilning 23-sentabr kuni “El-yurt umidi” jamgʻarmasi ijrochi direktori Gulnoza Ismailova Nyu-Yorkda Xalqaro taʼlim instituti (IIE) prezidenti Jeyson Siz va IIE Fulbrightʼning talabalar va ilmiy dasturlari boʻyicha vitse-prezidenti Edvard Monks bilan uchrashdi.

Maʼlumot uchun: Xalqaro taʼlim instituti 1919-yilda tashkil etilgan, xalqaro taʼlim va akademik hamkorlik sohasida faoliyat yurituvchi xalqaro notijorat tashkilotdir. Institut faoliyati taʼlim va ilmiy tadqiqot tashabbuslari orqali mamlakatlar oʻrtasida oʻzaro tushunishni rivojlantirish va tinchlikni mustahkamlashga qaratilgan. Institut AQSH Fulbrayt dasturi, Benjamin A. Gilman xalqaro stipendiyasi, Hubert H. Humphrey stipendiya dasturi va Davlat departamentining Taʼlim va madaniyat byurosi (ECA) nomidan Xalqaro tashrif buyuruvchi yetakchilik dasturi (IVLP)ni boshqaradi.

Uchrashuv davomida tomonlar quyidagi yoʻnalishlarda hamkorlik istiqbollarini muhokama qildi:
- Stipendiatlar uchun Fulbright va boshqa IIE dasturlari orqali qoʻshma moliyalashtirish dasturi va oʻzbekistonlik yoshlar uchun qoʻshimcha oʻrinlar (kvotalar) ajratish;
- Stipendiya tanlovlarni tashkil etishda tajriba almashish, jamgʻarmaning ochiq stipendiya tanlovlarini takomillashtirish, jarayonga xalqaro standartlarni joriy etish;
- Xalqaro hamkor universitetlar bilan qoʻshma ilmiy loyihalar va tadqiqotlarni yoʻlga qoʻyish;

-  Davlat xizmatchilariga, professor-oʻqituvchilarga va ilmiy tadqiqotchilarga AQShning yetakchi tashkilotlarida stajirovka oʻtash;
- “El-yurt umidi” stipendiatlari uchun global mentorlik va ilmiy tarmoqlarga ulanish imkoniyatlarini kengaytirish.

Uchrashuv yakunida oʻzaro hamkorlikning mexanizmlarini ishlab chiqish, uzoq muddatli hamkorlik uchun asos boʻladigan memorandumni imzolash boʻyicha kelishuvga erishildi.

Ushbu hamkorlik “El-yurt umidi” jamgʻarmasining xalqaro taʼlim maydonidagi mavqeyini mustahkamlash, ilgʻor tajribalarni joriy etish va Oʻzbekistonning kadrlar salohiyatini rivojlantirishga salmoqli hissa qoʻshishi kutilmoqda.

Eslatib oʻtamiz, “El-yurt umidi” jamgʻarmasi rahbariyati Oʻzbekiston delegatsiyasi tarkibida Nyu-Yorkda BMT Bosh Assambleyasining 80-yubiley sessiyasida ishtirok etish maqsadida AQShda boʻlib turibdi.