“El-yurt umidi” jamgʻarmasi stipendiatlari yosh olimlar va biznes vakillari oʻrtasidagi muloqotda takliflari bilan ishtirok etdi

Bugun Savdo-sanoat palatasi tashabbusi bilan yosh olimlar va biznes vakillari oʻrtasida ochiq muloqot boʻlib oʻtdi. Ushbu tadbir ilm-fan, innovatsiyalar va xususiy sektor oʻrtasidagi hamkorlik aloqalarini mustahkamlashga xizmat qiluvchi muhim platformaga aylandi.

Muloqot davomida innovatsion gʻoyalar, ilmiy ishlanmalarni tijoratlashtirish, investitsiyalar jalb etish va amaliy hamkorlik imkoniyatlari yuzasidan fikr almashildi.

Tadbirda “El-yurt umidi” jamgʻarmasi ijrochi direktori oʻrinbosari Shuxrat Daminov hamda Zoom orqali 20 nafardan ortiq jamgʻarma stipendiatlari ishtirok etdi. Jumladan, Kanadadagi Toronto universiteti talabasi Shaxriyor Baxtiyorov hamda Italiyaning Turin politexnika universiteti doktoranti Temur Turgʻunboyev oʻz taklif va tashabbuslarini ilgari surdilar.

Xususan, ishlab chiqarish boshqaruvi va muhandislik sohasida ilmiy faoliyat olib borayotgan T. Turgʻunboyev elektromobillar va elektrobuslar uchun innovatsion quvvatlash qurilmasi konsepsiyasini taqdim etdi.