Русский
English
Joriy yilning 3-iyun kuni jamgʻarmaning 2025-yil 1-ochiq stipendiya tanlovi uchun nomzodlar roʻyxatdan oʻtishlari uchun onlayn platforma orqali hujjatlar qabuli boshlanganligi eʼlon qilindi.
Shu munosabat bilan, Oʻzbekiston Respublikasi Prezidenti huzuridagi Davlat xizmatini rivojlantirish agentligi bilan hamkorlikda respublikamizning barcha hududlarida keng qamrovli onlayn seminarlar tashkil etish yoʻlga qoʻyildi.
Mazkur seminarlarning asosiy maqsadi jamgʻarmaning ochiq stipendiya tanlovlari tartibi bilan bogʻliq yangiliklarni vazirlik, idora va tashkilotlar, shuningdek, hududlardagi yoshlar orasida keng targʻib etishdan iborat.
Xususan, Samarqand, Qashqadaryo, Surxondaryo, Xorazm, Namangan viloyatlari hamda Qoraqalpogʻiston Respublikasida stipendiat boʻlish istagidagi yoshlar uchun shunday seminarlar oʻtkazildi. Seminarlarda 100 ming nafardan ortiq davlat va nodavlat muassasalari xodimlari, oliy oʻquv yurtlari talabalari, ixtisoslashtirilgan maktablarning oʻquvchilari, ilmiy izlanuvchilar, maktab bitiruvchilari va boshqa yoshlar ishtirok etdilar.
Onlayn seminarda “El-yurt umidi” jamgʻarmasi ijrochi direktori Gulnoza Ismailova hamda boshqarma boshligʻi Elbek Iskandarov tomonidan PF-77-sonli Prezident farmonining mazmun-mohiyati, jamgʻarma ochiq stipendiya tanlovlarini oʻtkazish tartibi, ajratilgan kvotalar, ustuvor yoʻnalishlar, tanlovni tashkil etish mexanizmi hamda elektron hujjat topshirish platformasining ishlash tartibi bilan bogʻliq yangiliklar toʻgʻrisida taqdimot qilindi.
Shu bilan birga, seminar davomida hozirda xorijda taʼlim olayotgan 24 nafar stipendiat ham ishtirok etib, oʻzlarining stipendiat boʻlish yoʻllari hamda xorijdagi nufuzli oliy taʼlim muassasalarida tahsil olish tajribalari bilan ishtirokchilar bilan oʻrtoqlashdilar.
Bundan tashqari, ishtirokchilarga til bilish koʻnikmalarini yaxshilash borasida zarur tavsiyalar berildi. Uchrashuv yakunida barcha yurtdoshlarimizning qiziqtirgan savollariga jamgʻarma mutaxassislari hamda stipendiatlar tomonidan batafsil javoblar berildi.