O‘zbekiston Respublikasi Prezidentining iqtisodiy taraqqiyot, samarali boshqaruv va xalqaro hamkorlik masalalari bo‘yicha maslahatchi Suma Chakrabarti bilan uchrashuv bo‘lib o‘tdi.

2025-yil 3-iyun kuni O‘zbekiston Respublikasi Prezidentining iqtisodiy taraqqiyot, samarali boshqaruv va xalqaro hamkorlik masalalari bo‘yicha maslahatchi Suma Chakrabarti bilan uchrashuv bo‘lib o‘tdi. Uchrashuvda Davlat siyosati va boshqaruvi akademiyasi rektori J. Salixov, Istiqbolli kadrlarni tayyorlash bo‘yicha “El-yurt umidi” jamg‘armasi ijrochi direktori G. Ismailova hamda  boshqa mas'ul xodimlar ishtirok etdilar.

Uchrashuv maqsadi – O‘zbekiston Respublikasi Prezidentining Davlat siyosati va boshqaruvi akademiyasi, “El-yurt umidi” jamg‘armasi faoliyatini tubdan transformatsiya qilish yuzasidan qabul qilingan farmonlarining ijrosini ta’minlashda Davlat boshqaruvi akademiyasi, Davlat xizmatini rivojlantirish agentligi va “El-yurt umidi” jamg‘armasi o‘zaro faoliyati va funksiyalarini yanada izchillashtirish va muvofiqlashtirish bo‘yicha kadrlar tayyorlash milliy klaster tizimi negizidagi mas’ul tashkilotlarning faoliyatini samarali tashkil etish hamda ushbu tashkilotlarning Prezident maslahatchisining loyiha ofisi ekspertlari bilan yaqindan hamkorlik qilib borishi masalalarini muhokama qilish.

Uchrashuv avvalida Akademiya rektori tomonidan Prezident maslahatchisiga O‘zbekiston Respublikasi Prezidentining 2025-yil 5-maydagi “Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari to‘g‘risida”gi farmoni bilan Akademiya yuklatilgan vazifalarning ijrosini so‘zsiz, aniq va belgilangan muddatlarda ta’minlash maqsadida hozirgi kunda olib borilayotgan va kelgusi yillar uchun rejalashtirilayotgan ishlar bo‘yicha atroflicha ma’lumotlar berildi.

“El-yurt umidi” jamg‘armasining ijrochi direktori tomonidan O‘zbekiston Respublikasi Prezidentining PF-77 “Iqtidorli mutaxassislarning xorijda ta’lim olishini qo‘llab-quvvatlash, ularda kasbiy ko‘nikmalarini rivojlantirish va rag‘batlantirishga oid qo‘shimcha chora-tadbirlari to‘g‘risida”gi farmonida belgilangan vazifalar, xususan vazirlik, idora, iqtisodiyot tarmoqlari strategik korxonalari, shuningdek, yetakchi oliy ta’lim muassasalari, tadqiqot va tahliliy markazlari istiqbolli mutaxassislarining rivojlangan mamlakatlardagi yetakchi universitetlar, ilmiy markazlar, turli kompaniya va tashkilotlarda maqsadli stajirovkasini tashkil etilishi yuzasidan ma’lumot berildi.

Shu bilan birgalikda, oliy ta’lim muassasalari bilan hamkorlikda xorijiy mamlakatlarda faoliyat yuritayotgan, Scopus tizimida «Xirsh» indeksi (h-indeks) yuqori bo‘lgan olim, professor-o‘qituvchi va tadqiqotchilarni o‘quv kurs va fanlarni o‘qitish hamda tadqiqotlar olib borish uchun jalb etilishi xaqida to‘xtab o‘tildi.

Jumladan, O‘zbekiston Respublikasi Prezidentining PF-77, PF-78-sonli farmonlariga muvofiq mas’ul tashkilotlarning o‘zaro faoliyati muvofiqlashtirilishi, ularni kadrlar tayyorlash va ularni davlat xizmatiga samarali jalb etishda funksiya va vakolatlari yaxlit tizimni shakllantirishga va ushbu jarayonda aniq mexanizmlar ishlab chiqilishi katta ahamiyat kasb etishi alohida ta’kidlab o‘tildi.

Prezident maslahatchisi klaster tizimining samarali joriy etish bo‘yicha o‘z fikrlari bilan o‘rtoqlashgan holda kadrlarni tayyorlash va ularni davlat xizmatiga jalb etishda barcha mas’ul tashkilotlar faoliyati muvofiqlashtirilgan va hamohang holda tashkil etilishi jarayonda yuzaga kelishi mumkin bo‘lgan nuqsonlik va muammolarga tez va manzilli yechimlar topishga xizmat qilishiga alohida e’tibor qaratdi.