Русский
English
Joriy yilning 15-may kuni “El-yurt umidi” jamg‘armasi rahbariyati va AQShning Yuta shtatidan tashrif buyurgan AQShning Yuta shtati Senati raisi Styuart Adams va Yuta shtati JST raisi Jeff Fleyk boshchiligidagi delegatsiya a’zolari o‘rtasida hamkorlik aloqalarini o‘rnatish masalalari muhokamasi yuzasidan o‘zaro uchrashuv bo‘lib o‘tdi.
Uchrashuvda, Jamg‘arma ijrochi direktori tomonidan delegatsiya a’zolariga davlatimiz rahbarining “Iqtidorli mutaxassislarni xorijda ta’lim olishini qo‘llab-quvvatlash, ularda kasbiy ko‘nikmalarini rivojlantirish va rag‘batlantirishga oid qo‘shimcha chora-tadbirlari to‘g‘risida”gi Farmonining mazmun va mohiyati bilan tanishtirib hamda bugungi kunda ta’limga qaratilgan ustuvor yo‘nalishlarda amalga oshirilayotgan islohatlar bilan tanishtirib o‘tdi.
Bundan tashqari Jamg‘arma ijrochi direktori, Professor Gulnoza Ismailova tomonidan “El-yurt umidi” jamg‘armasi tomonidan tanlov asosida saralab olingan vazirlik, idora va iqtisodiyot tarmoqlarining strategik korxonalari mutaxassislari va yetakchi oliy ta’lim muassasalari o‘qituvchilarini Yuta jahon savdo markazi orqali Yuta shtatidagi kompaniya va tashkilotlarda xalqaro savdo, eksport boshqaruvi, logistika, marketing, menejment yo‘nalishlarida 1 oydan 6 oygacha bo‘lgan muddatda malaka oshirish dasturlarini tashkil etish bo‘yicha taklif kiritdi.
O‘z o‘rnida mazkur takliflar AQShning Yuta shtati Senati raisi Styuart Adams qo‘llab-quvvatlanib, mazkur yo‘nalishlarda hamkorlik aloqalarini o‘rnatishga kelishib olindi.
Mazkur uchrashuvda Jamg‘arma stipendiatlarining Yuta shtatidagi universitetlarda ta’lim olishida ko‘maklashish, shuningdek, Jamg‘arma stipendiya tanlovida ishtirok etish istagida bo‘lgan nomzodlari uchun universitetda o‘qish imkoniyatlari, hujjat topshirish jarayonlari bo‘yicha onlayn vebinar tashkil etishga kelishib olindi.
2025-yildan boshlab ushbu universitetda o‘qish uchun boradigan Jamg‘arma stipendiatlarning o‘qish xarajatlaridan chegirmalar ajratilishiga kelishib olindi.
Uchrashuvning yana bir asosiy masalalaridan biri Qo‘shma ta’lim dasturlarini tashkil etish - Yuta shtatidagi Yuta universiteti (University of Utah-THE 201-255) bilan aloqalarni yo‘lga qo‘yish va bu orqali oliy ta’lim muassasalarida qo‘shma ta’lim dasturlarini tashkil etishga ko‘maklashish, malaka oshirish va akademik almashinuv- Yuta jahon savdo markazi hamkor tashkilotlari orqali O‘zbekistonlik o‘qituvchilar, ilmiy tadqiqotchilar va ta’lim sohasidagi mutaxassislar uchun malaka oshirish, ilmiy izlanish, hamda AQSh tajribasini o‘rganish bo‘yicha qisqa muddatli dasturlar tashkil qilish va Scopus tizimining Xirsh indeksi (h-index) dan yuqori bo‘lgan professor-o‘qituvchilarni O‘zbekiston ta’lim muassasalariga, ilmiy markazlarda ta’lim berishga taklif etish kabi masalalar ilgari surildi.
Uchrashuvlar yakunida hamkorlik aloqalarining istiqbollarini belgilovchi, yuqoridagi takliflarni o‘z ichiga olgan yangilangan ikki tomonlama memorandum imzolashga kelishib olindi.