Русский
English
2025-yilning 25-aprel kuni “El-yurt umidi” jamg‘armasi rahbariyati va AQSHning “University of Texas Dallas” universiteti (UT Dallas) Global aloqalar bo'yicha vitse-prezident Juan E. González hamda universitet professori, vatandoshimiz Anvar Zahidov o‘rtasida hamkorlik aloqalarini yanada kengaytirish masalalari muhokamasi yuzasidan Jamg’armada uchrashuv bo‘lib o‘tdi.
“El-yurt umidi” jamg‘armasi ijrochi direktor o‘rinbosari v.b Javohir Axmedov ushbu universitet vakillari bilan joriy yilning 1-8-mart kunlari Texas shtatining
Xyuston shahrida bo‘lib o‘tgan "Building bridges: leading internationalization in a changing world" mavzusidagi xalqaro konferensiyasi davomida muzokaralar olib brogan edi.
Ma’lumot uchun: University of Texas Dallas (UT Dallas) AQShning Texas shtatidagi Richardson shahrida joylashgan davlat tadqiqot universitetidir. U 1961-yilda Texas Instruments kompaniyasining xususiy tadqiqot markazi sifatida tashkil etilgan va hozirda University of Texas tizimining bir qismi hisoblanadi.
Universitet haqida umumiy ma’lumot:
- O‘quv dasturlari: 57 ta bakalavriat, 59 ta magistratura va 32 ta doktorantura dasturlari mavjud.
- Kampus maydoni: 645 akr (taxminan 261 gektar).
- Tadqiqot yo‘nalishlari: Kosmik fanlar, bioinjinering, kiberxavfsizlik, nanotexnologiya bo’yicha yetakchi sanaladi.
- Akademik maqomi: "R1: Juda yuqori tadqiqot faolligiga ega doktorantura universitetlari" toifasiga kiradi.
Kuchli akademik yo‘nalishlar:
UT Dallas quyidagi yo‘nalishlarda kuchli akademik dasturlari bilan tanilgan:
- Kompyuter fanlari: Kompyuter fanlari dasturi universitetning eng mashhur va raqobatbardosh yo‘nalishlaridan biridir.
- Telekommunikatsiya: Telekommunikatsiya sohasida ilg‘or tadqiqotlar olib boriladi.
- Neuroscience (Neyrofiziologiya): Miya va xulq-atvor fanlari bo‘yicha yetakchi tadqiqot markazlariga ega.
- Biznes va boshqaruv: Naveen Jindal School of Management orqali biznes va boshqaruv sohalarida sifatli ta’lim taklif etiladi.
Mazkur uchrashuvda o‘zaro hamkorlik aloqalarini yuqori darajaga olib chiqish bo‘yicha bir qator masalalar muhokama qilindi, jumladan, UT Dallas tomonidan Jamg‘arma stipendiatlariga universitetda yaratib beriladigan sharoitlar, ularni yaxshi ta’lim olishlari uchun hamkorlikda kelajakda amalga oshiriladigan vazifalar, ularni o‘qish xarajatlaridan chegirmalar olish, doktorantlikka nomzodlar uchun ilmiy rahbar topish kabi muhim masalalar muhokama markazida bo‘ldi.
Uchrashuv davomida, Jamg‘arma ijrochi direktori o‘rinbosari v.b Javohir Axmedov tomonidan vazirlik va idoralarning maqsadli buyurtmasi asosida davlat xizmatchilarini ushbu universitetda qisqa stajirovka dasturlarini tashkil etish bo‘yicha hamda “El-yurt umidi” jamg‘armasi stipendiatlar uchun o‘qish xarajatlaridan 50-60 % chegirmalar ajratilish taklif qilindi.
O‘z o‘rnida mazkur takliflar Juan E. González tomonidan qo‘llab-quvvatlanib, mazkur yo‘nalishlarda hamkorlik aloqalarini o‘rnatishga kelishib olindi. “El-yurt umidi” jamg‘armasi stipendiyasi orqali ushbu universitetlarga boruvchi bakalavr va magistrantlarga 30 %, doktorantlarga esa 100 % chegirmalar ajratilishini belgilandi.
Mazkur uchrashuvda Jamg‘arma stipendiatlarini ushbu universitetda ta’lim olishida ko‘maklashish shuningdek, Jamg‘arma stipendiya tanlovida ishtirok etish istagida bo‘lgan nomzodlar uchun universitetda o‘qish imkoniyatlari, hujjat topshirish jarayonlari bo‘yicha may oyida onlayn vebinar tashkil etishga kelishib olindi.
Uchrashuvlar yakunida “University of Texas Dallas” bilan hamkorlik aloqalarining istiqbollarini belgilovchi, yuqoridagi takliflarni o‘z ichiga olgan ikki tomonlama memorandumni yaqin kunlar ichida imzolashga kelishib olindi.