Oliy ta’lim, fan va innovatsiyalar vazirining "El-yurt umidi" jamg‘armasi stipendatlari bilan ochiq muloqoti bo‘lib o‘tdi.

“El-yurt umidi” jamg‘armasi orqali dunyoning nufuzli oliygohlarida ta’lim olib qaytgan va hozirda O‘zbekistondagi OTMlarda mehnat faoliyatini olib borayotgan bitiruvchilar uchun vazirlikda ochiq muloqot bo‘lib o‘tdi. Mazkur tizimda Respublikamizning turli hududlarida faoliyat yuritayotgan stipendiatlar esa Zoom ilovasi orqali onlayn ishtirok etishdi.

Ushbu uchrashuvda, Oliy ta’lim, fan va innovatsiyalar vaziri Sharipov Kongratbay Avezimbetovich, Innovatsion rivojlanish agentligi direktori Rajabbayev Sharof Raximberdiyevich, Jamg‘arma ijrochi direktor o‘rinbosari v.b. Javohir Axmedov va Jamg‘arma stipendiatlari hamda vazirlik boshqarma boshliqlari ishtirok etishdi.

Ushbu tadbirni tashkil etishdan maqsad, stipendiatlar bilan doimiy muloqot o‘rnatish va ularni qiynab kelayotgan yoki qiziqtirgan masalalarga yechim topishdan hamda oliy ta’lim, fan va innovatsiyalar sohasini takomillashtirish bo‘yicha xorij tajribasini amaliyotga joriy etishda taklif va tavsiyalarini tinglashdan iborat.

Uchrashuvda OTMlar tizimida faoliyat olib borayotgan 150dan ortiq Jamg‘arma stipendiatlari ishtirok etib, o‘z fikr va tashabbuslarini bildirishdi.

Uchrashuvda ishtirok etgan Sharipov Kongratbay Avezimbetovich barcha stipendiatlarni istiqbolli taklif va rejalarni har doim qo‘llab quvvatlashga tayyor ekanligini ma’lum qildi. Shuningdek, xorijiy bilim va tajribaga ega bo‘lgan Jamg‘arma stipendiatlarini vazirlik tizimidagi tashkilotlariga ishga qabul qilishga tayyor ekanliklarini bildirishdi.

Shuningdek, Jamg‘arma stipendiatlar ta’til vaqtida mamlakatimizga qaytganlarida ularni mazkur vazirlikda amaliyot o‘tashlari bo‘yicha takliflariga vazirlik rahbariyati sharoitlar yaratib berishga tayyorligini ma’lum qildi.

Shu bilan birga, uchrashuv davomida mazkur vazirlikda stipendiatlar bilan doimiy muloqot o’rnatadigan telegram bot yaratishga kelishib olindi.

Onlayn uchrashuv jarayoni qizg‘in savol javoblarga boy tarzda o‘tkazilib, vazirlikning barcha rahbar xodimlari bilan Jamg‘arma stipendiatlari o‘rtasida to‘g‘ridan-to‘g‘ri muloqot qilish imkoniyati yaratilib, hamkorlikda loyihalar amalga oshirishga kelishib olindi.