“El-yurt umidi” jamg‘armasi va Buyuk Britaniyaning “University of Surrey” universiteti vakillari o‘rtasida hamkorlik masalalari yuzasidan onlayn muloqot bo‘lib o‘tdi!

Joriy yilning 16-aprel kuni “El-yurt umidi” jamg‘armasi rahbariyati hamda Buyuk Britaniyaning “University of Surrey” universiteti qabul bo‘yicha direktori Ryan Miles o‘rtasida hamkorlik masalalari yuzasidan onlayn muloqot bo‘lib o‘tdi.

Ma’lumot uchun: “University of Surrey” universiteti 1966-yilda Angliyaning Guildford shahrida joylashgan taʼlim va tadqiqot sohasida tashabbuskor va alohida standartlarga egaligi bilan tan olingan taniqli ta’lim muassasasi boʻlib, u muhandislik, fizika, biznes, ijtimoiy fanlar, ta’lim, sog‘liqni saqlash va tibbiyot fanlari kabi turli sohalarni o‘z ichiga qamrab olgan koʻplab bakalavriat dasturlarini taqdim etadi. Sanoatni jalb qilish va amaliy o‘rganishga jiddiy e’tibor qaratish orqali universitet o‘z talabalarini tanlagan sohalarida tajribali va malakali bo‘lishlari uchun barcha sharoitlarni yaratib beradi. O‘zining zamonaviy qulayliklari va tarbiyaviy muhiti bilan ajralib turadigan Surrey universiteti jahon miqyosida ajoyib iste’dodlarni jalb qilishda yetakchi universitet hisoblanadi. Ushbu universitet xalqaro The (Times Higher Education) University  reytingida 201 o’rinni egallaydi.

Uchrashuv davomida Jamg‘arma ijrochi direktor o‘rinbosari v.b Javohir Axmedov tomonidan mamlakatimizda kadrlar tayyorlash tizimini isloh qilishga qaratilgan chora-tadbirlar, o‘zbek yoshlarining yetakchi xorijiy universitetlarda ta’lim olishi va ilmiy-tadqiqot faoliyati uchun yaratilgan shart-sharoitlar, Jamg‘armaning ta’lim dasturlari bo‘yicha mutaxassislarni xorijdagi nufuzli universitetlarda jumladan, Buyuk Britaniyaning “University of Surrey” universitetida ta’lim olishi yuzasidan hamkorlikni kengaytirish, shuningdek, Jamg‘arma stipendiatlariga barcha dasturlar bo‘yicha ma’lum miqdorda grant ajratish tashkil etish yuzasidan takliflar ilgari surildi.

 “University of Surrey” universiteti va Jamg‘arma hamkorligida O‘zbekiston yoshlari uchun mazkur universitetda ta’lim olish imkoniyatlariga bag‘ishlangan vebinar tashkil etish taklif qilindi.

Barcha takliflar “University of Surrey” qabul bo‘yicha direktori Ryan Miles   tomonidan ma’qullandi va 2025-yildanboshlab barcha “El-yurt umidi” jamg‘armasi stipendiatlarining o‘qish xarajatlaridan 20 foizlik chegirma ajratilishini ma’lum qildi.

Mazkur uchrashuvlar yakunida hamkorlik aloqalarining istiqbollarini belgilovchi, yuqoridagi takliflarni o‘z ichiga olgan ikki tomonlama memorandum imzolashga kelishib olindi.