"El-yurt umidi" jamg‘armasining hamkorlik geografiyasi kengaymoqda!

"El-yurt umidi" jamg‘armasi xalqaro hamkorlik doirasini yanada kengaytirish maqsadida bir qator nufuzli universitetlar bilan uchrashuvlar o‘tkazdi. Muzokaralar davomida stipendiatlar va ilmiy tadqiqotchilar uchun yanada qulay shart-sharoitlar yaratish, shuningdek, o‘qish xarajatlariga 30% dan 40% gacha chegirmalar olishga erishildi.

Ushbu hamkorlik doirasida AQShning bir nechta yetakchi universitetlari bilan aloqalar o‘rnatildi. Jumladan, Purdue University (THE reytingida 79-o‘rinda) texnika va muhandislik sohasidagi yetakchi oliy ta’lim muassasalaridan biri bo‘lib, bu yerda ilmiy tadqiqotlar va innovatsion loyihalar keng rivojlangan. Shuningdek, Vanderbilt University (THE 90) ta’lim sifati va tibbiyot yo‘nalishidagi yutuqlari bilan mashhur bo‘lib, talabalariga kuchli ilmiy va amaliy tayyorgarlikni taqdim etadi.

Texas A&M University (THE 143) muhandislik, qishloq xo‘jaligi va biznes yo‘nalishlarida yetakchilik qiluvchi universitetlardan biri hisoblanadi. George Washington University (THE 201-250) esa AQSh poytaxtida joylashgan bo‘lib, xalqaro munosabatlar, siyosatshunoslik va huquqshunoslik sohalarida yetuk mutaxassislarni tayyorlaydi. Shuningdek, Northeastern University (THE 201-250) amaliy ta’lim dasturlari bilan ajralib turadi va talabalarining tajriba orttirishiga katta e’tibor qaratadi.

Ta’lim sifatini doimiy ravishda oshirib borayotgan Rutgers University–New Brunswick (QS 328) tadqiqot va innovatsiyalar bo‘yicha kuchli universitetlardan biri sanaladi. University of Texas at Dallas va University of Houston (har ikkisi THE 401-500) texnologiya va biznes yo‘nalishlarida keng imkoniyatlarga ega bo‘lib, talabalar uchun ilg‘or ta’lim dasturlarini taklif etadi.

Jamg‘arma vakillari ushbu universitetlar bilan hamkorlikni mustahkamlash, akademik almashinuv dasturlarini kengaytirish va ilmiy loyihalarni qo‘llab-quvvatlashga qaratilgan muzokaralar olib bordilar. Ushbu kelishuvlar natijasida O‘zbekiston yoshlari dunyoning eng nufuzli oliy ta’lim muassasalarida o‘qish va tadqiqot olib borish imkoniyatlariga ega bo‘lishadi.