Русский
English
2025-yilning 6-fevral kuni “El-yurt umidi” jamg‘armasi xodimlariga O‘zbekiston Respublikasining «Manfaatlar to‘qnashuvi to‘g‘risida»gi qonuni bilan o‘rnatilgan talablar va mexanizmlarni davlat organlari va tashkilotlarida samarali joriy etish masalalari yuzasidan taqdimot bo‘lib o‘tdi.
Ushbu taqdimotda “El-yurt umidi” jamg‘armasi ijrochi direktor o‘rinbosari v.b Javohir Axmedov, bo‘lim boshliqlari hamda barcha xodimlar ishtirok etdi.
Ma’lumot uchun: mazkur qonunning maqsadi Manfaatlar to‘qnashuvi bilan bog‘liq munosabatlarni tartibga solishdan iborat. Qonun 5 ta bob, 33 ta moddadan iborat. Ushbu qonun 2024-yil 6-dekabr kuchga kirgan bo‘lib, manfaatlar to‘qnashuvi bilan bog‘liq munosabatlarni tartibga solishning asosiy prinsiplari quyidagilardan iborat:
- qonuniylik;
- fuqarolarning, tashkilotlarning, jamiyatning va davlatning qonuniy manfaatlari ustuvorligi;
- ochiqlik va shaffoflik;
- xolislik;
- korrupsiyaga nisbatan murosasizlik.
Taqdimotda qonunning asosiy mohiyati, Jamg‘arma xodimlari o‘rtasida manfaatlar to‘qnashuviga yo‘l qo‘ymaslik, o‘ziga yuklatilgan vazifalarni sitqidildan bajarish, davlat qonun va qarorlariga asosan faoliyat yuritish, stipendiatlarning barcha muammolarini tezkorlik bilan hal qilishga ko‘maklashish hamda korrupsiyaga qarshi murosasiz kurash olib borilishi alohida tushuntirildi.
Shu o‘rinda, manfaatlar to‘qnashuvini o‘z vaqtida aniqlash va oldini olish hamda xodimlar tomonidan manfaatlar to‘qnashuvi to‘g‘risida deklaratsiya to‘ldirish tartiblari to‘g‘risida to‘liq ma’lumotlar berildi.
“El-yurt umidi” jamg‘armasi tashkil etilgandan beri korrupsion holatlar uchramagani e’tirof etildi hamda barcha Jamg‘arma jamoasi bundan keyin ham halol ishlashlari aytib o‘tildi.
Tadbir yakunida korrupsion holatlarni oldini olishga qaratilgan bu kabi tadbirlar va seminarlarni doimiy ravishda o‘tkazib borish zarurligi qayd etildi.