Хорижий мамлакатларда таълим олаётган ва ҳозирда таътилга қайтиб, вазирлик ва идораларда амалиёт ўтаётган стипендиатлари билан навбатдаги онлайн мулоқоти бўлиб ўтди!

Жорий йилнинг 12 июль куни “Эл-юрт умиди” жамғармаси ижрочи директор ўринбосари в.б. Жавохир Ахмедов Жамғарма бўлим бошлиқлари, ривожланган хорижий мамлакатларнинг нуфузли университетларида таълим олаётган Жамғарма стипендиатлари иштирокида ZOOM платформаси орқали онлайн мулоқот ўтказилди.

Мазкур онлайн мулоқотни ўтказишдан кўзланган мақсад – Жамғарма стипендиатлари билан доимий мулоқотни давом эттириш, стипендиатларда ватанпарварлик туйғусини ошириш, уларда миллий қадриятларини ривожлантириш, улар дуч келаётган муаммоларини ўрганиш ва ҳал қилишга кўмаклашиш, шунингдек, келажакдаги режаларини билиш, Жамғарма фаолиятини такомиллаштириш ҳамда хорижда таълим олаётган мутахассисликлари бўйича мамлакатимизни янада ривожлантириш юзасидан таклифларини ўрганиш ва амалиётга жорий қилишга кўмаклашиш, ҳозирги кунда дунёда рўй бераётган вазиятларда қандай иш тутиш кераклиги тўғрисида маслаҳатлар берилди ҳамда уларни ўқишларини тугатиб қайтганларидан сўнг вазирликлар тизимида меҳнат фаолиятини олиб боришни ташкил этиш кўзда тутилган.

Маълумот учун: Жамғарма томонидан бугунги кунда 550 нафарга яқин стипендиат  АҚШ, Буюк Британия, Германия, Франция, Япония, Канада, Италия, Испания, Жанубий Корея каби ривожланган мамлакатларнинг глобал академик рейтингларда ТОП-300 таликка кирган, University College London, Imperial College London, Columbia University, Cornell University ва бошқа нуфузли университетларида мамлакатимиз учун устувор ҳисобланган мутахассисликларда, Жамғарма таълим дастурлари бўйича ўқишларини давом эттиришмоқда.

Онлайн мулоқот жараёнида Жамғарма раҳбарияти томонидан стипендиатлари учун яратиб берилаётган қўшимча имкониятлар, уларнинг замонавий билим ва кўникмаларни эгаллашлари учун давлатимиз раҳбари томонидан стипендиатларнинг хорижда таълим олиши учун давлат бюджетидан мунтазам ва барқарор маблағ ажратиб борилаётганлиги, улар мазкур имкониятдан фойдаланган ҳолда мамлакатимизни ривожланган давлатлар қаторига қўшиш учун хорижда олган билим ва тажрибаларини сафарбар этишлари лозимлиги таъкидланди.

Шунингдек, Жамғарманинг 2024 йилда стипендиатлар учун яхши янгиликлар бўлиши, юртимиз юксалишида ўз таклифларини илгари суриш ва ушбу жараёнларда стипендиатларнинг фаол иштирок этиш масалалари ҳам муҳокама қилинди.

Стипендиатлар ўзи таълим олаётган хорижий университетларида Ўзбекистоннинг ижобий имиджини янада ошириш юзасидан тақдимотлар, давра суҳбатларини ташкил этиш лозимлиги алоҳида таъкидлаб ўтилди.

Маълумот ўрнида: Ўзбекистоннинг хориждаги дипломатик ваколатхонаси вакиллари Жамғарма стипендиатлари ва барча Ўзбекистонлик талабаларни қўллаб-қувватлаб улар билан учрашувлар ташкил этиб келмоқда.

Шу билан бирга, таътилга қайтган Жамғарма стипендиатларининг амалиёт давомида нималар ўргангани, уларнинг ечимини излаётган масалаларга таклифлари ҳамда хориж тажрибасини соҳаларга интеграция қилишдаги фикрлари тингланди. Мазкур йўналишда Жамғарма раҳбарияти вазирликлар билан стипендиатларнинг амалиёт ўташлари бўйича яқиндан кўмак кўрсатиб келмоқда.