“Эл-юрт умиди” жамғармасининг 2024 йилги 1-очиқ стипендия танлови тартиби билан боғлиқ янгиликларга бағишланган навбатдаги онлайн семинар бўлиб ўтди!

Жорий йил 5 июль куни Давлат хизматини ривожлантириш агентлиги Бухоро вилояти бошқармаси, туманлар ҳокимликлари билан ҳамкорликда “Эл-юрт умиди” жамғармасининг 2024 йилги 1-очиқ стипендия танловлари тартиби билан боғлиқ янгиликларни вилоят ёшлари ва мутахассислари орасида кенг тарғиб этишга қаратилган навбатдаги онлайн тарғибот семинари ўтказилди.

Ушбу онлайн семинарни ўтказишдан мақсад- мамлакатимизда иқтидорли ва истиқболли ёш мутахассисларни қўллаб-қувватлаш борасида амалга оширилаётган ишлар, уларнинг хориждаги нуфузли таълим ва илмий муассасаларда таҳсил олиши, Жамғарманинг танлов жараёнларида қатнашиш ҳамда стипендиатларга яратиб берилган имкониятлар тўғрисида Бухоро вилояти ёшлари ва мутахассисларига маълумотлар бериш мақсадида ташкил этилди.

Семинарда 7500 дан ортиқ Бухоро вилоятининг давлат ташкилоти ва муассасалари вакиллари, олий ўқув юртлари талабалари, профессор-ўқитувчилари, вилоятдаги мактабларнинг ўқувчилари ва ўқитувчилари вилоят ёшлари ва мутахассислар, шунингдек, 14 га яқин нуфузли хорижий олий таълим муассасаларида таҳсил олаётган, Бухоролик “Эл-юрт умиди” жамғармаси стипендиатлари иштирок этдилар.

Онлайн учрашувда “Эл-юрт умиди” жамғармаси ижрочи директор ўринбосари в.б. Ж. Ахмедов томонидан очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилди.

Семинар сўнгида вилоят ёшлари ва мутахассислар ўзларини қизиқтирган саволларга Жамғарма масъуллари ҳамда стипендиатлари томонидан жавоб олдилар.

Эслатиб ўтамиз, семинарлар Республикамиз бўйлаб ўтказиб борилмоқда. Ушбу жараёнлар келажакда юртимизга тиргак бўладиган ёшларни кашф қилишда ёрдам беради.