Фарғона вилояти ёшлари ва мутахассислари учун “Эл-юрт умиди” жамғармаси масъуллари ҳамда стипендиатлари томонидан онлайн семинар ўтказилди!

2024 йил 4 июль куни  Жамғарманинг 2024 йилги 1-очиқ стипендия танлови тартиби билан боғлиқ янгиликларни вазирлик, идора, давлат ташкилотларини Фарғона вилояти ҳудудидаги ходимлар, ОТМлар талабалари ҳамда илмий изланувчилари, мактаб битирувчилари ва ёшлар орасида кенг тарғиб этишга қаратилган онлайн ҳудудий семинар бўлиб ўтди.

Мазкур семинар Ўзбекистон Республикаси Президенти ҳузуридаги Давлат хизматини ривожлантириш агентлигининг Фарғона вилояти бўлими билан ҳамкорликда ташкил этилган бўлиб, семинарда 7000 нафар давлат ташкилоти ва муассаса раҳбарлари, ходимлари ва олий ўқув юртлари талабалари, ихтисослаштирилган мактабларнинг ўқувчилари ва ёшлар иштирок этдилар.

Онлайн семинарда Фарғона вилояти бўлган Жамғарманинг хорижда таълим олаётган 13 нафар стипендиатлари ҳам иштирок этиб, Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар бердилар.

Стипендиатларимиз Жамғарма томонидан ўтказилаётган очиқ стипендия танловлари шаффоф ҳолда ўтказилишини таъкидлаб, Стипендиатларнинг таълим олиш даврида мунтазам уларни қўллаб-қувватлаб келаётганларини эътироф этди.

Онлайн семинарда “Эл-юрт умиди” жамғармаси ижрочи директор ўринбосари в.б. Жавохир Аҳмедов томонидан Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилинди.

Семинар якунида стипендиатлар томонидан барча семинар иштирокчиларига тил билиш кўникмаларини яхшилаш борасида керакли тавсиялар берилди.