Русский
English
2024 йил 29-май куни “Эл-юрт умиди” жамғармасида ижрочи директор ўринбосари в.б. Ж.Aхмедов, Жамғарма бўлим бошлиқлари ҳамда Буюк Британиянинг Рединг университетининг Марказий Осиё бўйича минтақавий директори Мега Девли иштирокида икки томонлама ҳамкорлик алоқаларини янада кенгайтириш юзасидан учрашув бўлиб ўтди.
Маълумот учун: Рединг университети (University of Reading) 1892 йилда Оксфорд университетининг Рединг университети коллежи сифатида ташкил этилган. Университет ўзининг ёрқин тарихи, истиқболлари, илмий-тадқиқот марказлари ва ўзининг бетакрор яшил муҳити билан халқаро ҳамжамиятда катта нуфузга эга. Буюк Британиянинг “Яшил Университет” рейтингида “Яшил Байроқ” мукофоти билан тақдирланган. Университетда 23000 дан ортиқ талабалар таҳсил олади.
Рединг университети 2024 йилда халқаро QS рейтингида 169-ўринни эгаллаган. Бугунги кунда Жамғарманинг 22 нафар стипендиатлари мазкур университетда таҳсил олишади. 2023 йилнинг июнь ойида ушбу университет билан “Эл-юрт умиди” жамғармаси ўртасида икки томонлама ҳамкорлик меморандуми имзоланган эди.
Мазкур учрашувда, Жамғарма ва Буюк Британиянинг Рединг университети ўртасида стипендиатларни таълим олишини таъминлаш, давлат хизматчилари учун стажировка дастури масаласи батафсил муҳокама қилинди. Хусусан, ушбу стажировка дастурида соҳага оид вазирлик ва идоралар ходимлари иштирокини йўлга қўйиш масаласи ҳам муҳокама қилинди.
Рединг университети ва “Эл-юрт умиди” жамғармаси мунтазам равишда юртимиздаги ёшлар учун онлайн вебинарлар ташкил қилиб бормоқда. Яқин кунлар ичида талабалар ва мактаб битирувчилари ҳамда мутахассислар учун онлайн вебинарлар ташкил этилиши режалаштирилган.
Учрашув сўнгида, Жавоҳир Ахмедовни таклифига жавобан университет вакили Мега Девли ҳар бир “Эл-юрт умиди” жамғармаси томонидан ўқишга юборилган стипендиатлар учун эндиликда 20% лик чегирма (амалда 10% чегирма мавжуд) ажратиш масаласи муҳокама қилинди ва қўшимча шартнома имзолашга келишиб олинди.