Русский
English
2024 yilning 16 aprel kuni “El-yurt umidi” jamg‘armasida ijrochi direktor o‘rinbosari v.b. Javohir Axmedov, Jamg‘arma bo‘lim boshliqlari va SEPIE tashkiloti direktori Alfonso Gentil Alvarez-Ossoriyo, Ispaniya elchixonasi Taʼlim boshqarmasi maslahatchisi Albert Vitria hamda Granada universiteti Xalqaro masalalar bo‘yicha prorektori Inmakulada Marrero o‘rtasida hamkorlik aloqalari yuzasidan uchrashuv bo‘lib o‘tdi.
Maʼlumot uchun: “El-yurt umidi” jamg‘armasi va SEPIE tashkiloti o‘rtasida 2023 yilning 25 aprel kuni hamkorlik Memorandumi imzolangan edi. «SEPIE» tashkiloti Ispaniya Qirolligining barcha oliy taʼlim muassasalariga, shu jumladan xususiy universitetlarga chet elda ispan taʼlimini targ‘ib qilish va xorijiy mamlakatlardan talabalar va professorlarni jalb qilish bo‘yicha universitetlar strategiyalarini amalga oshirishda yordam berish va qo‘llab-quvvatlash uchun masʼul tashkilot hisoblanadi. Taʼlim tizimi deyarli barcha sohalar uchun mutaxassislar tayyorlash imkoniyatiga ega ekanligi sababli bugungi kunda ushbu tashkilot Argentina, Paragvay, Urugvay, Braziliya, Xitoy va boshqa mamlakatlar vazirlik va idoralari bilan taʼlim sohasida uzoq muddatli hamkorlik aloqalarini olib bormoqda.
Granada universiteti Ispaniyaning Granada shahrida joylashgan davlat universiteti bo‘lib, 1531 yilda imperator Karl v tomonidan asos solingan. 60 000 dan ortiq talaba tahsil oladi. Ispaniyaning 4 ta yirik universitetlaridan biri hisoblanadi. Granada shahridan tashqari, universitetning Seuta va Melilla shaharlarida ham kampuslari mavjud. Universitetning Zamonaviy tillar markazi har yili 10 000 dan ortiq xalqaro talabalarni qabul qiladi. 2014 yilda Granada universiteti xalqaro talabalar tomonidan eng yaxshi ispan universiteti deb topilgan. Universitet, qurilish muhandisligi, axborot texnologiyalari, meditsina, turizm sohalari bo‘yicha eng yaxshi universiteti hisoblanadi. Universitet ARWU World reytingida 201-300 o‘rinlarni egallaydi.
Mehmonlarga Jamg‘arma ijrochi direktori o‘rinbosari tomonidan Jamg‘arma faoliyati to‘g‘risida qo‘shimcha maʼlumotlar berib o‘tildi.
Mazkur uchrashuvda, Jamg‘arma va SEPIE tashkiloti, Granada universiteti o‘rtasida davlat xizmatchilari uchun stajirovka dasturi masalasi batafsil muhokama qilindi.
Ispaniyaning Granada universiteti kontrakt to‘lovlari 3000- 4000 yevroni tashkil etadi. Kontrakt miqdorining boshqa Yevropa universitetlariga qaraganda arzonroqligi kelajakda ushbu universitetga ko‘proq stipendiatlarni yuborish imkoniyatini beradi.
Qo‘shimcha tarzda, hozirgi kunda Ispaniyada 2 ta universitetda 2 ta Jamg‘arma stipendiati o‘qishi haqida ham maʼlumot berildi va kelajakda talabalar sonini oshirish to‘g‘risida ham muzokaralar olib borildi
Yaqin kunlar ichida yurtimizdagi talabalar va maktab bitiruvchilari uchun butun respublikamiz bo‘ylab universitet masʼullari bilan birgalikda onlayn vebinarlar tashkil etilishi rejalashtirildi.
Kelajakda, “El-yurt umidi” jamg‘armasi stipendiatlarining o‘qish xarajatlaridan chegirmalar ajratish taklif qilindi va ushbu taklif universitet rahbariyati tomonidan qo‘llab-quvvatlandi.
Uchrashuv so‘nggida, ikki tomon o‘rtasida stajirovka sohasi, Stipendiatlarni ushbu universitetda taʼlim olishini yo‘lga qo‘yish hamda Jamg‘arma va Granada Universiteti o‘rtasida hamkorlik memorandumini imzolashga kelishib olindi.
Endilikda Ispaniyada o‘qish uchun boradigan “El-yurt umidi” jamg‘armasi stipendiatlari uchun, Ispaniya Qirolligi tomonidan tezlashtirilgan viza olish masalasi kelishib olindi.
