Русский
English
2024 йилнинг 14 март куни Олий таълим, фан ва инновациялар вазирлиги тизимидаги университетларнинг битирувчи курс талабалари ҳамда ўқитувчилари учун “Лидс университетида бакалавриат, магистратура ва докторантура таълим дастурларида таҳсил олиш имкониятлари” мавзусида ZOOM иловаси орқали вебинар ташкил этилди.
Маълумот учун: Лидс университети Лидсдаги давлат тадқиқот университети бўлиб, 1904 йилда ташкил этилган. Университетда 300 та бакалавриат ва 200 та магистратура дастурлари мавжуд.
Университет халқаро рейтингларида юқори ўринларга эга. Жумладан, “QS World University” рейтингида 75-ўринни эгаллаган. Бир қатор фанлар бўйича хусусан, геология, қишлоқ ва ўрмон хўжалиги, физика, астрономия, санъат, фармацевтика, анатомия, психология, кимё, информатика, иқтисодиёт ва муҳандислик бўйича дунёда етакчи ўринларда туради.
Мазкур вебинарда Жамғарма ижрочи директор ўринбосари в.б Жавохир Аҳмедов, Жамғарма бўлим бошлиқлари ҳамда Лидс университети Халқаро алоқалар бўйича менежери Стюарт Хожсон иштирок этишиб, республикамиздаги ОТМлар битирувчи курс талабалари ҳамда профессор-ўқитувчилар иштирок этди ва улар учун тақдимот қилинди.
Вебинарда, Буюк Британиянинг Лидс университетига ўқишга қабул қилиш имкониятлари, талабаларга яратиб берадиган шароитлар, ҳужжат топшириш жараёнлари ва берилаётган “Scholarship”лар тўғрисида маълумот берилди.
Вебинарда ушбу университетда таҳсил олувчи "Эл-юрт умиди" жамғармасининг 5 нафар стипендиати ҳам қатнашиб, университет қандай қилиб ҳужжат топшириш керак, Жамғарма танловларидан мувафаққиятли ўтиш учун нималарга эътибор бериш кераклиги ва университетга келгандан кейин нималарни билиш кераклиги тўғрисида тавсия ва маслаҳатлар беришди.
Учрашув қизғин савол-жавобларга бой тарзда ўтказилди. Тақдимотдан сўнг иштирокчилар Лидс университети вакили Стюарт Хожсонга ҳамда "Эл-юрт умиди" жамғармаси жамоасига ўзларини қизиқтирган масалалар бўйича саволлар беришди ва барча саволларга батафсил жавоб олишди.
Ушбу вебинарда юртимизнинг турли вилоятларидан ва Олий таълим муассасаларидан ҳамда Жамғарма фаолияти кузатиб борувчи обуначилардан жами 2,000 дан ортиқ киши иштирок этди.