Қашқадарё вилояти ёшлари учун “Эл-юрт умиди” жамғармаси масъуллари ҳамда АҚШнинг Сиракуз университети мутахассислари томонидан онлайн семинар ўтказилди!

2024 йил 5 февраль куни Жамғарманинг стипендия танлови тартиби билан боғлиқ янгиликларни Қарши шаҳридаги ихтисослаштирилган мактабнинг ўқувчилари ва ёшлар орасида кенг тарғиб этишга қаратилган онлайн семинар бўлиб ўтди.

Мазкур семинарда Жамғарма ижрочи директор ўринбосари в.б Жавохир Аҳмедов, Жамғарма жамоаси ва асли Қашқадарёлик бўлган, АҚШнинг Сиракуз университети Марказий Осиё бўйича координатори ватандошимиз Миржаҳон Турдиевлар ҳамда Қарши шаҳридаги ихтисослаштирилган мактабнинг ўқувчилари ва ёшлар иштирок этдилар.

Онлайн семинарда, Жавохир Аҳмедов Жамғарма очиқ стипендия танловларини ўтказиш тартиби, ажратиладиган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилди.

АҚШнинг Сиракуз университети Марказий Осиё бўйича координатори Миржаҳон Турдиев вилоятдош мактаб ўқувчиларига хорижда ўқиш учун қанчалик қийналганлиги, ўзининг кечинмалари ҳақида гапириб, Жамғарма томонидан ўтказилаётган очиқ стипендия танловлари шаффоф ҳолда ўтказилишини таъкидлаб, стипендиатларнинг таълим олиш даврида мунтазам уларни қўллаб-қувватлаб келаётганларини эътироф этди. Бундай имкониятлардан фойдаланмаслик ёшликни беҳуда сарфлаш эканлигини эслатиб, ёшларга мотиватцион мастер-класс ўтиб берди.

Семинар сўнгида ўқувчиларни қизиқтирган барча саволларга мутасаддилар томонидан жавоб берилди.