Русский
English
Хабарингиз бор, 2023 йил 15 март куни “Эл-юрт умиди” жамғармасида Буюк Британиянинг Рединг университетининг минтақавий катта менежери Ирем Озсой ва менежери Шаойинг Лу иштирокида икки томонлама ҳамкорлик алоқаларини белгиловчи меморандум лойиҳасининг онлайн муҳокамаси ҳақида эълон қилган эдик.
Жорий йилнинг 19 июнь куни “Эл-юрт умиди” жамғармасида ижрочи директор ўринбосари в.б. Ж. Aхмедов ва Буюк Британиянинг Рединг университети раҳбарияти иштирокида икки томонлама ҳамкорлик алоқаларини белгиловчи меморандум имзоланди.
Маълумот учун: Рединг университети (University of Reading) 1892 йилда Оксфорд университетининг Рединг университети коллежи сифатида ташкил этилган. Университет ўзининг ёрқин тарихи, истиқболлари, илмий-тадқиқот марказлари ва ўзининг бетакрор яшил муҳити билан халқаро ҳамжамиятда катта нуфузга эга. Буюк Британиянинг “Яшил Университет” рейтингида “Яшил Байроқ” мукофоти билан тақдирланган.
Меморандумга кўра, мазкур университетда ўқиётган ҳар бир стипендиатларнинг ўқиш харажатларидан 10% миқдорда чегирмалар берилишига эришилди.
Шунингдек, бугунги кунда мазкур университетда таълим олаётган 17 нафар Жамғарма стипендиатларини таълим олиш жараёнларида яқиндан ёрдам бериш, уларнинг яхши ўқишлари учун қўшимча шароитлар яратиш, суғурталаш жараёнларига кўмаклашиш каби келишувга эришилди.
Бундан ташқари вазирлик ва идораларнинг мақсадли буюртмаси асосида давлат хизматчиларини ушбу университетда қисқа муддатли малака ошириш ва стажировка ўтишини ташкил қилиш ҳамда республикамиздаги олий таълим муассасаларига университет профессор-ўқитувчиларини жалб этишга ҳам келишиб олинди.
Ўз ўрнида Рединг университети раҳбарияти икки томонлама алоқаларни янада кенгайтиришга тайёр эканликларини маълум қилишди.
Куннинг иккинчи ярмида Ж. Aхмедов, Рединг университетида таҳсил олаётган Жамғарма стипендиатларининг ўқиш ва яшаш шароитларини мониторинг қилишга қаратилган учрашув ўтказди. Уларнинг ўқишидаги муаммолар, уларни бартараф этиш йўллари ва келажакдаги режалари билан фикр алмашилди.
