“ЭЛ-ЮРТ УМИДИ” ЖАМҒАРМАСИ ҲАМДА КАНАДАНИНГ РОССИЯДАГИ ЭЛЧИХОНАСИ ВАКИЛЛАРИ ЎРТАСИДА УЧРАШУВ БЎЛИБ ЎТДИ!

Жорий йилнинг 3 май куни “Эл-юрт умиди” жамғармасида ижрочи директор ўринбосари в.б. Ж. Ахмедов, Жамғарма бўлим бошлиғи А. Хамдамов ҳамда Канаданинг Россия Федерациясидаги элчихонасининг Миграция масалалари бўйича маслаҳатчиси Мари-Пьер Коте ва тегишли расмийлари иштирокида икки томонлама ҳамкорлик алоқаларини ўрнатиш масалалари муҳокамаси юзасидан учрашув бўлиб ўтди.

Учрашувда “Эл-юрт умиди” жамғармаси стипендиатларининг Канаданинг нуфузли университетларида таълим олиши учун қўшимча имкониятлар яратиш, стипендиатлар учун виза олиш тартибини соддалаштириш масаласи муҳокама қилинди.

Бугунги кунда, Жамғарма стипендиатларининг 4 нафар University of Toronto, McGill University, University of Alberta, University of Ottawa каби Канаданинг нуфузли университетларида таҳсил олаётган бўлиб, уларнинг ўқиш шароитларини яхшилаш уларга қўшимча имкониятлар яратиб бериш, суғурта шартларини енгиллаштириш масалалари ҳам ушбу учрашувда муҳокама қилинди.

Элчихона вакили Мари-Пьер Коте берган маълумотларга кўра, мамлакатимиздан Канада визасини олиш учун ҳужжат топширган 70 % га яқин номзодлар ҳужжатларини тўлиқ белгиланган тартибда тўлдиришда хатоларга йўл қўйганлиги ва бошқа турли сабабларга кўра ушбу давлатга виза берилмайди.

Мулоқот давомида Жамғарма стипендиатларига виза бериш жараёнида уларни қўллаб қувватлаш, ҳужжатларни юклаш, элчихонага юбориш жараёнлари ҳамда виза олиш юзасидан ҳамкорликда семинар тренинглар ўтказишга ва стипендиатларга тезлаштирилган тартибда виза тақдим этишга келишилди.

Шунингдек, Мари-Пьер Коте “Эл-юрт умиди” жамғармаси ҳамда Канаданинг нуфузли университетлари ўртасида ҳамкорлик алоқаларини ўрнатишда яқиндан кўмаклашишга тайёр эканлигини маълум қилди.

Учрашув якунида томонлар, ўзаро истиқболли алоқаларни янги босқичга кўтариш бўйича ҳамкорлик қилишга келишиб олдилар.