Русский
English
Жорий йилнинг 28 апрель куни “Эл-юрт умиди” жамғармаси билан ҳамкорлик алоқаларини янада ривожлантириш мақсадида Жанубий Кореянинг Ҳанянг университети (Hanyang University) раҳбарияти Жамғармага ташриф буюрди.
Маълумот учун: Бугунги кунда, Жанубий Кореяда 10 га яқин стипендиатларимиз таҳсил олмоқдалар. Ҳанянг университети Жанубий Кореядаги хусусий тадқиқот университети ҳисобланиб, асосий кампуси Сеул шаҳрида жойлашган ва QS халқаро рейтингида 157 ўринни эгаллайди. Университет 1939 йилда муҳандислик мактаби сифатида ташкил этилган.
Бундан ташқари, университет ҳар йили 7400 дан ортиқ чет эллик талабаларни қабул қилади ва 3000 дан ортиқ талабаларни бошқа чет эл давлатларида таълим олиш учун ўқишга юборади. Мазкур университет Massachusetts Institute of Technology (MIT), University of Cambridge каби дунёнинг 88 давлатидаги етакчи 820 дан ортиқ университетлар билан фаол ҳамкорлик олиб бормоқда.
“Эл-юрт умиди” жамғармаси ҳамда Ҳанянг университети ўртасида алмашинув меморандуми имзоланган бўлиб, бугунги кунда томонлар таълим дастурлари бўйича ўзаро ҳамкорлик алоқаларини олиб бормоқдалар.
Учрашувда, ўзаро манфаатли алоқаларини ривожлантириш масалалари муҳокама қилинди. Хусусан, қисқа муддатли малака ошириш ва стажировка курсларини ташкил этиш, Жамғарма стипендиатларининг университетда таҳсил олишлари учун қулай шарт-шароитлар яратиш ва ажратиладиган грантлар миқдорини ошириш, Жамғарма танловлари ғолибларига тез фурсатда қабул хати олишда кўмаклаш каби масалалар томонлар ўртасида муҳокама қилинди.
Учрашув сўнгида ўзаро ҳамкорлик алоқаларини давом эттириш ва турли тарғибот тадбирларини ташкил этишга келишиб олинди.