“Эл-юрт умиди” жамғармаси ва Жанубий Калифорния университети ўртасида ҳамкорлик алоқаси йўлга қўйилди

Жорий йилнинг 26 апрель куни “Эл-юрт умиди” жамғармаси ижрочи директор ўринбосари в.б. Ж. Ахмедов, бўлим бошлиғи A.Хамдамов ва бош мутахассис М. Хошимов ҳамда АҚШнинг Жанубий Калифорния (University Of Southern California) университетининг Глобал ҳамкорлик бўйича проректори Пауло Родригес, Халқаро қабул бўйича менежери Кина Сугита ўртасида икки томонлама ҳамкорлик алоқаларини ўрнатиш масалалари муҳокамаси юзасидан ZOOM платформаси орқали онлайн учрашув бўлиб ўтди.

Маълумот учун: Жанубий Калифорния университети 1880 йилда Лос-Анжелесда адвокат Роберт Виднининг саъй-ҳаракатлари туфайли очилган. Вақт ўтиши билан университет дунёдаги энг йирик вa нуфузли таълим муассасаларидан бирига айланди. Жанубий Калифорния университетида 17 та факультет мавжуд бўлиб, университетда 38 мингга яқин талаба таҳсил олади, уларнинг 22 фоизи чет эл фуқароларидир.

Мазкур университет халқаро миқёсда эътироф этилган академик рейтингларда жумладан, Thе U. S. Nеws аnd Wоrld Rеpоrt (27 ўринни), ARWU (53 ўринни), TНE (65 ўринни) ва  QS (134 ўринни) эгаллаган.

Университетнинг асосий ғурури механик муҳандислик йўналиши, санъат вa гуманитар фанлар мактаби бўлиб, у ерда энг кўп тадқиқотлар олиб борилади вa архитектура, дизайн, киношунослик, журналистика бўйича энг яхши дастурлар таклиф этилади. Ушбу дастурларнинг аксарияти соҳа бўйича дунёнинг энг яхши 60 талик рейтингига киритилган. Университет битирувчиларни иш билан таъминлаш бўйича юқори кўрсаткичларга эга. USC бизнес мактаби ҳам сифатли таълим бериши билан машҳур.

Жанубий Калифорния университети масъулларига Ж. Ахмедов томонидан “Эл-юрт умиди” жамғармаси фаолияти таълим дастурлари ва стипендия танловлари юзасидан батафсил маълумот берилди.

Учрашувда, “Эл-юрт умиди” жамғармаси ва Жанубий Калифорния университети билан ўзаро манфаатли ҳамкорлик алоқаларини ривожлантириш, қисқа муддатли малака ошириш ва стажировка курсларини ташкил этиш каби масалалар муҳокама қилинди.

Музокаралар давомида томонлар ҳамкорликнинг истиқболлари, келажакда бакалавриат, магистратура ва докторантура дастурлари бўйича Жамғарма стипендиатларининг Жанубий Калифорния университетида таълим олиш имкониятлари, қулай шарт-шароитлар яратиш, Жамғарма орқали университетда таълим олишни режалаштираётган ҳар бир стипендиатларнинг ўқиш харажатларидан чегирмалар ажратиш ва бошқа масалалар муҳокама қилинди. Ушбу таклифларга жавобан Жанубий Калифорния университети раҳбарияти Жамғарманинг магистратура дастури стипендиатлари учун чегирмалар ажратишга, докторантура босқичи учун тўлов контрактини бепул қилишга тайёр эканликларини маълум қилдилар.

Мазкур учрашув якуни бўйича томонлар ҳамкорлик алоқаларини истиқболини белгиловчи юқоридаги таклифларни ўз ичига олган икки томонлама меморандум лойиҳасининг дастлабки таклиф варианти кўриб чиқиш ва имзолашга ҳамда ҳамкорликда семинарлар ташкил этишга келишиб олдилар.

Эслатиб ўтамиз, бу каби нуфузли хорижий олий таълим муассасалари ва “Эл-юрт умиди” жамғармаси ўртасида ҳамкорлик алоқаларни ўрнатишда Жамғарма стипендиатлари муҳим роль ўйнамоқда. Хусусан бугунги учрашув “Эл-юрт умиди” жамғармаси стипендиати, Жанубий Калифорния университети талабаси Суннатилла Муртазаев кўмагида ташкил этилди.