Русский
English
Жорий йилнинг 25 апрель куни “Эл-юрт умиди” жамғармаси ижрочи директор ўринбосари в.б. Ж.Ахмедов, Жамғарма бўлим бошлиқлари A.Хамдамов ва A.Aъзамхонов ҳамда Испания Қироллигининг Таълимни халқаролаштириш хизматининг Олий таълимни халқаролаштириш масалалари бўйича директори Хосе Аурелио Лианеза Вилянуева ва Таълимни халқаролаштириш хизмати координатори Фатима Терол иштирокида икки томонлама ҳамкорлик алоқаларини янада кенгайтириш ва ҳамкорлик алоқаларини белгиловчи икки томонлама ҳамкорлик меморандумини имзолаш юзасидан учрашув бўлиб ўтди.
Маълумот учун: “SEPIE” Испания Қироллигининг барча олий таълим муассасаларига, шу жумладан хусусий университетларга чет элда испан таълимини тарғиб қилиш ва хорижий мамлакатлардан талабалар ва профессорларни жалб қилиш бўйича университетлар стратегияларини амалга оширишда ёрдам бериш ва қўллаб-қувватлаш учун масъул ташкилот ҳисобланади. Таълим тизими деярли барча соҳалар учун мутахассислар тайёрлаш имкониятига эга эканлиги сабабли бугунги кунда ушбу ташкилот Аргентина, Парагвай, Уругвай, Бразилия, Хитой ва бошқа мамлакатлар вазирлик ва идоралари билан таълим соҳасида узоқ муддатли ҳамкорлик алоқаларини олиб бормоқда.
Мазкур учрашувда, Жамғарма танловларида ғолиб бўлган стипендиатларни Испания Қироллигининг нуфузли университетларида таълим олишини ташкил этиш, мазкур давлатда бугунги кунда таълим олаётган Жамғарма стипендиатларининг ҳар томонлама қўллаб-қувватлаш имкониятлари муҳокама қилинди.
Мазкур давлат олий таълим тизимининг сифат жиҳатдан ишончлилиги ва таълим олиш нархининг АҚШ ва Буюк Британия олий таълим муассасалари таълим тўловларига нисбатан 4-5 баробар арзонлиги Испания Қироллигининг юқори рейтингларга эга нуфузли университетларида Жамғарма стипендиатларини сонининг оширилишига, ҳамкорликда Испания университетларида таълим олиш имкониятлари мавзусида вебинарлар ташкил этиш бўйича келишиувларга эришилди.
Шунингдек, “Эл-юрт умиди” жамғармаси ва SEPIE ташкилоти ўртасидаги ўзаро ҳамкорлик алоқалари истиқболини белгиловчи икки томонлама меморандум имзоланди.
Келишувга кўра Жамғарма ва SEPIE ўртасида Испания университетлари ва олий таълим муассасаларида магистратура ва докторантура дастурларида таълим олиш истагида бўлган Жамғарма стипендиатлари, шунингдек, олий таълим муассасалари ўқитувчилари ва тадқиқотчиларининг академик ва маданий алмашинувига кўмаклаш, шу орқали магистратура ва докторантура дастурларида ғолиб бўлган Жамғарма стипендиатлари учун нуфузли университетлардан ўқиш харажатларидан чегирмалар олишга хизмат қилади.
Шунингдек, ҳамкорлик доирасида томонлар тажриба алмашиш мақсадида, Испания Қироллигининг нуфузли университетларидан хорижлик мутахассисларни жалб қилган ҳолда, Олий таълим муассасалари талабалари ва илмий изланувчилари учун семинарлар, маҳорат дарслари ва бошқа тадбирларни ҳамкорликда ташкил этадилар.
Бундан ташқари, ташкилот томонидан дунё миқёсида тан олинган халқаро рейтингларда юқори ўринларни эгаллаган Испания Қироллиги университетлари билан Жамғарма ўртасидаги тўғридан тўғри ҳамкорлик алоқаларини ўрнатишда кўмаклашади.
“Эл-юрт умиди” жамғармаси билан ҳамкорликда вазирлик ва идораларнинг мақсадли буюртмаси асосида давлат хизматчиларини мазкур ташкилот ва Испания Қироллиги университетлари қисқа муддатли малака ошириш ва стажировка дастурлари ташкил қилинади.