Самарқанд вилояти ёшлари ҳамда давлат хизматчилари учун онлайн семинар ўтказилди

Жорий йилнинг 17 апрель куни “Эл-юрт умиди” жамғармаси, Давлат хизматини ривожлантириш агентлигининг Самарқанд вилояти бошқармаси билан ҳамкорликда Жамғарманинг 2023 йилги 1 очиқ стипендия танлови тартиби билан боғлиқ янгиликларни ёшлар ҳамда давлат хизматчилари орасида кенг тарғиб этишга қаратилган навбатдаги онлайн ҳудудий семинар ташкил этилди.

Мазкур семинарда 8 мингдан ортиқ Самарқанд вилоятининг давлат ташкилоти ва муассаса раҳбарлари, ходимлари ҳамда олий ўқув юртлари талабалари, профессор-ўқитувчилар, мактаб ўқувчилари ҳамда Жамғарма фаолиятига қизиқувчи ёшлар, шунингдек, 20 га яқин нуфузли хорижий олий таълим муассасаларда таҳсил олаётган, Самарқандлик “Эл-юрт умиди” жамғармаси стипендиатлари иштирок этдилар.

Тадбирга “Эл-юрт умиди” жамғармаси фаолияти, 2023 йилги 1 очиқ стипендия танловига бағишланган видеоролик билан старт берилди. Шундан сўнг, “Эл-юрт умиди” жамғармаси ижрочи директор ўринбосари в.б. Ж. Ахмедов томонидан Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилинди.

Онлайн мулоқот давомида Самарқандлик “Эл-юрт умиди” жамғармаси стипендиатлари Жамғарма танловлари, нуфузли хорижий университетларда ўқиш имкониятлари, ўзлари босиб ўтган йўл ҳамда номзодлар эътибор қаратиши лозим бўлган алоҳида жиҳатлар тўғрисида семинар иштирокчиларига маълумотлар бердилар.

Самарқанд вилояти ёшлари ва мутахассисларига "Эл-юрт умиди" жамғармаси фаолияти ҳамда хорижда таълим олиш ҳақида кенг маълумотлар тақдим этиш мақсадида стипендиатлар иштирокидаги телеграм гуруҳи ташкил этилди.

Тадбир сўнгида, Самарқанд вилояти ёшлари ва мутахассислари ўзларини қизиқтирган саволларига тегишли жавобларни Жамғарма масъуллари ва стипендиатларидан олдилар.

Эслатиб ўтамиз, 31 мартдан 15 апрелга қадар "Эл-юрт умиди” жамғармаси фаолияти ҳамда танловларига оид маълумотларни кенг тарғиб этишга қаратилган онлайн тарғибот семинарларда жами 75 300 дан ортиқ Қорақалпоғистон Республикаси, вилоятлар ва Тошкент шаҳри давлат ташкилоти ва муассаса раҳбарлари, ходимлари, олий ўқув юртлари талабалари, профессор-ўқитувчилар, мактаб ўқувчилари, Жамғарма стипендиатлари ва ёшлар иштирок этдилар.