Русский
English
Жорий йилнинг 15 апрель куни, "Эл-юрт умиди” жамғармаси фаолияти ҳамда танловларига оид маълумотларни Тошкент шаҳри ёшлари ва мутахассислари орасида кенг тарғиб этишга қаратилган навбатдаги онлайн тарғибот семинар ўтказилди.
Тадбир “Эл-юрт умиди” жамғармаси ҳамда Давлат хизматини ривожлантириш агентлигининг Тошкент шаҳри филиали билан ҳамкорликда ташкил этилди.
Семинар “Эл-юрт умиди” жамғармаси фаолияти, 2023 йилги 1 очиқ стипендия танловига бағишланган видеоролик намойиши билан очиб берилди.
Семинарда 7 мингга яқин Тошкент шаҳрининг давлат ташкилоти ва муассасалари вакиллари, олий ўқув юртлари талабалари, профессор-ўқитувчилари, мактаб ўқувчилари, Жамғарма фаолиятига қизиқувчи ёшлар, шунингдек, 50 дан ортиқ нуфузли хорижий олий таълим муассасаларида таҳсил олаётган, Тошкент шаҳридан бўлган “Эл-юрт умиди” жамғармаси стипендиатлари иштирок этдилар.
Онлайн учрашувда “Эл-юрт умиди” жамғармаси ижрочи директор ўринбосари в.б. Ж. Ахмедов томонидан Жамғарма фаолияти, очиқ стипендия танловларининг ўтказилиш тартиби, ажратилган квоталар, устувор йўналишлар, танловни ташкил этиш механизмлари ҳамда электрон ҳужжат топшириш платформасидан фойдаланиш юзасидан тақдимот қилинди.
Жамғарманинг стипендиатлари сони бўйича Тошкент шаҳри биринчи ўринни эгаллаши таъкидланди. Бу эса ўз навбатида Жамғарма танловларига қизиқиш ҳамда хорижий билим ва кўникмаларни ўзлаштиришга бўлган интилиш пойтахтда юқори эканлиги айтиб ўтилди.
Шундан сўнг, Тошкент шаҳридан бўлган “Эл-юрт умиди” жамғармаси стипендиатлари Жамғарма танловлари, нуфузли хорижий университетларда ўқиш имкониятлари, ўзлари босиб ўтган йўл ҳамда номзодлар эътибор қаратиши лозим бўлган алоҳида жиҳатлар тўғрисида семинар иштирокчиларига маълумот бердилар.
Тошкент шаҳри ёшлари ва мутахассисларига "Эл-юрт умиди" жамғармаси фаолияти ҳамда хорижда таълим олиш ҳақида кенг маълумотлар тақдим этиш мақсадида стипендиатлар иштирокидаги телеграм гуруҳи ташкил этилди.
Семинар қатнашчилари ўзларини қизиқтирган саволларга Жамғарма масъуллари ҳамда стипендиатлари томонидан жавоб олдилар.
Эслатиб ўтамиз, навбатдаги онлайн семинарнинг 17 апрелдаги учрашуви Самарқанд вилояти ёшлари, мутахассислари ва давлат хизматчилари учун ўтказиш режалаштирилган.