“Эл-юрт умиди” жамғармасининг 2023 йилги 1-очиқ стипендия танлови тартиби билан боғлиқ янгиликларга бағишланган навбатдаги онлайн семинарлар бўлиб ўтди!

Жорий йилнинг 14 апрель куни Давлат хизматини ривожлантириш агентлиги Сирдарё ва Тошкент вилоятлари бошқармаси, вилоятлар ва туманлар ҳокимликлари билан ҳамкорликда “Эл-юрт умиди” жамғармасининг 2023 йилги 1-очиқ стипендия танловлари тартиби билан боғлиқ янгиликларни вилоятлар ёшлари ва мутахассислари орасида кенг тарғиб этишга қаратилган навбатдаги онлайн тарғибот семинарлари ўтказилди.

Мазкур онлайн семинарни ўтказишдан мақсад мамлакатимиздаги иқтидорли ва истиқболли ёш мутахассисларни қўллаб қувватлаш борасида амалга оширилаётган ишлар, уларнинг хориждаги нуфузли таълим ва илмий муассасаларда таълим олиши, Жамғарманинг танлов жараёнларида қатнашиш ҳамда стипендиатларга яратиб берилган имкониятлар тўғрисида Сирдарё вилояти ҳамда Тошкент вилоятларидаги давлат хизматчиларга, ёшлари ва мутахассисларига маълумотлар бериш мақсадида ташкил этилди.

Тадбир аввалида “Эл-юрт умиди” жамғармаси фаолияти, 2023 йилги 1-очиқ стипендия танловига бағишланган видеороликлар намойиш этилди.

Куннинг биринчи ярмида 3000 дан ортиқ Сирдарё вилоятининг давлат ташкилоти ва муассасалари вакиллари, олий ўқув юртлари талабалари, профессор-ўқитувчилари, вилоятдаги мактабларнинг ўқувчилари ва ўқитувчилари вилоят ёшлари ва мутахассислар, шунингдек, 10 га яқин нуфузли хорижий олий таълим муассасаларида таҳсил олаётган, Сирдарёлик “Эл-юрт умиди” жамғармаси стипендиатлари иштирок этдилар.

Куннинг иккинчи ярмида 5000 мингдан ортиқ Тошкент вилоятининг давлат ташкилоти ва муассасалари ходимлари ҳамда олий ўқув юртлари талабалари, Президент мактаблари, ихтисослаштирилган мактабларнинг ўқувчилари ва ёшлар ва мутахассислар иштирок этдилар. Шунингдек, 30 дан ортиқ ривожланган мамлакатларнинг нуфузли университетларида таълим олаётган, Тошкент вилоятидан бўлган “Эл-юрт умиди” жамғармаси стипендиатлари иштирок этдилар.

Ўтказилган онлайн семинарларда “Эл-юрт умиди” жамғармаси ижрочи директор ўринбосари в.б. Ж. Ахмедов томонидан Жамғарма фаолияти, очиқ стипендия танловларининг ўтказилиш тартиби, ажратилган квоталар, устувор йўналишлар, танловни ташкил этиш механизмлари ҳамда электрон ҳужжат топшириш платформасидан фойдаланиш юзасидан тақдимот қилинди.

Онлайн мулоқотларда иштирок этган Сирдарё ва Тошкент вилоятидан бўлган “Эл-юрт умиди” жамғармаси стипендиатлари томонидан Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар берилди.

Тақдимотлар қизғин савол-жавоблар ва муҳокамаларга бой тарзда ўтказилиб, вилоятлар ёшлари ва мутахассислар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар.

Эслатиб ўтамиз, бу каби онлайн семинарнинг 15 апрелдаги учрашуви Тошкент шаҳридаги вазирлик, идора ва ташкилотларининг ходимлари, Олий ўқув юртлари талабалари, Президент мактаблари, ихтисослаштирилган мактабларнинг ўқувчилари, ёшлар, мутахассислар ва давлат хизматчилари учун ўтказиш режалаштирилган.