Русский
English
Жорий йилнинг 13 апрель куни Давлат хизматини ривожлантириш агентлиги Жиззах вилояти бошқармаси, туманлар ҳокимликлари билан ҳамкорликда “Эл-юрт умиди” жамғармасининг 2023 йилги 1-очиқ стипендия танловлари тартиби билан боғлиқ янгиликларни вилоят ёшлари ва мутахассислари орасида кенг тарғиб этишга қаратилган навбатдаги онлайн тарғибот семинари ўтказилди.
Мазкур онлайн семинарни ўтказишдан мақсад мамлакатимиздаги иқтидорли ва истиқболли ёш мутахассисларни қўллаб қувватлаш борасида амалга оширилаётган ишлар, уларнинг хориждаги нуфузли таълим ва илмий муассасаларда таълим олиши, Жамғарманинг танлов жараёнларида қатнашиш ҳамда стипендиатларга яратиб берилган имкониятлар тўғрисида Жиззах вилояти ёшлари ва мутахассисларига маълумотлар бериш мақсадида ташкил этилди.
Тадбир аввалида “Эл-юрт умиди” жамғармаси фаолияти, 2023 йилги 1-очиқ стипендия танловига бағишланган видеороликлар намойиш этилди.
Семинарда 5000 дан ортиқ Жиззах вилоятининг давлат ташкилоти ва муассасалари вакиллари, олий ўқув юртлари талабалари, профессор-ўқитувчилари, вилоятдаги мактабларнинг ўқувчилари ва ўқитувчилари вилоят ёшлари ва мутахассислар, шунингдек, 10 га яқин нуфузли хорижий олий таълим муассасаларида таҳсил олаётган, Жиззахлик “Эл-юрт умиди” жамғармаси стипендиатлари иштирок этдилар.
Онлайн учрашувда “Эл-юрт умиди” жамғармаси ижрочи директор ўринбосари в.б. Ж. Ахмедов томонидан Жамғарма фаолияти, очиқ стипендия танловларининг ўтказилиш тартиби, ажратилган квоталар, устувор йўналишлар, танловни ташкил этиш механизмлари ҳамда электрон ҳужжат топшириш платформасидан фойдаланиш юзасидан тақдимот қилинди.
Тадбир сўнгида вилоят ёшлари ва мутахассислар ўзларини қизиқтирган саволларга Жамғарма масъуллари ҳамда стипендиатлари томонидан жавоб олдилар.
Эслатиб ўтамиз, онлайн семинарнинг жорий йил 14 апрелдаги учрашуви Тошкент вилояти (соат 10:00 да) ҳамда Сирдарё вилояти (соат 15:00 да) давлат хизматчилари, талабалар, илмий изланувчилар, мактаб битирувчилари, вилоят ёшлари ва мутахассислари учун ўтказиш режалаштирилган.