“Эл-юрт умиди” жамғармаси ва Малайзия фан университети (USM) раҳбарияти ўртасида ZOOM платформаси орқали онлайн мулоқот бўлиб ўтди!

2023 йилнинг 12 апрель куни “Эл-юрт умиди” жамғармаси ижрочи директор ўринбосари в.б. Ж.Aхмедов, Жамғарма бўлим бошлиқлари A.Хамдамов ва A.Aъзамхонов, Ўзбекистоннинг Малайзиядаги элчихона вакиллари, ҳамда Малайзия фан университетининг (Universiti Sains Malaysia) (USM) Академик ва халқаро ишлар бўйича проректори Профессор Дато Нарима Самат, Академик ва халқаро масалалар бўйича халқаро стратегия директори Хазизан Акил, Халқаро мобиллик ва ҳамкорлик маркази директори Аизат Ҳишам Аҳмад ўртасида икки томонлама ҳамкорлик алоқаларини ўрнатиш масалалари муҳокамаси юзасидан онлайн мулоқот бўлиб ўтди.

Маълумот учун: Universiti Sains Malaysia (USM) – Малайзиядаги давлат тадқиқот университети бўлиб, 1969 йил 1 июнда ташкил этилган. Малайзиядаги энг қадимги олий ўқув юртларидан биридир. Университетда 34000 минг нафар талабалар, шундан 87 давлатлардан 900 га яқин хорижий талабалар таҳсил олишади. Университетнинг Малайзияда учта кампуси мавжуд, Пенанг оролидаги асосий кампус, Келантандаги соғлиқни сақлаш кампуси ва Нибонг Тебалдаги муҳандислик кампуси. Малайзия таълим вазирлиги томонидан 2018 йилнинг энг тадбиркор университети деб топилган. Шунингдек, халқаро миқёсда эътироф этилган халқаро QS рейтингида 143 ўриндан жой олган нуфузли университет саналади.

Мазкур учрашувда, Ж.Ахмедов томонидан Малайзия фан университети (USM) вакилларига “Эл-юрт умиди” жамғармаси фаолияти, таълим дастурлари ва стипендия танловлари юзасидан батафсил маълумот берилди. Шунингдек, мамлакатимизда кадрлар тайёрлаш тизимини ислоҳ қилишга қаратилган чора-тадбирлар, ўзбек ёшларининг етакчи хорижий университетларда таълим олиши ва илмий-тадқиқот фаолияти учун яратилган шарт-шароитлар, Жамғарманинг таълим дастурлари бўйича мутахассисларни хориждаги нуфузли университетларда жумладан, Малайзия фан университетида таълим олиши юзасидан ҳамкорлик алоқаларини ўрнатиш бўйича таклиф киритилди.

Шу билан бирга, мулоқот чоғида Жамғарма орқали университетда таълим олишни режалаштираётган ҳар бир стипендиатларнинг ўқиш харажатларидан чегирмалар ажратиш имкониятлари бўйича таклифлар киритилди. Ушбу таклифга жавобан Малайзия фан университети вакиллари томонидан университети Жамғарма стипендиатлари учун сўралган чегирмаларни ажратишга тайёр эканлигини ва бу ўзаро алоқаларни янада мустаҳкамлашга хизмат қилишини таъкидлади.

Шу билан бирга, вазирлик ва идораларнинг мақсадли буюртмаси асосида давлат хизматчиларини Малайзия фан университетида қисқа муддатли малака ошириш ва стажировка ўтишини ташкил бўйича таклифлар муҳокама қилинди. Ўз ўрнида мазкур таклифлар Малайзия фан университети раҳбарияти томонидан қўллаб қувватланиб, мазкур йўналишларда ҳамкорлик алоқаларини ўрнатишга келишиб олинди.

Мазкур учрашув якуни бўйича томонлар ҳамкорлик алоқаларини истиқболини белгиловчи юқоридаги таклифларни ўз ичига олган икки томонлама меморандум лойиҳасини ишлаб чиқиш, шунингдек, мамлакатимизнинг давлат хизматчилари ва ёшлари учун ҳамкорликда жорий йилнинг май ойида онлайн “Малайзия фан университетида таълим олиш имкониятлари” мавзусида семинар ташкил этишга келишиб олинди. Шунингдек, ўзаро ҳамкорлик алоқалари истиқболини белгиловчи ҳамкорлик меморандумини имзолаш бўйича, Ўзбекистоннинг Малайзиядаги элчихонаси вакилларини таклифлари инобатга олиниб, ҳар икки тараф вакиллари томонидан маъқулланиб, таклиф этилаётган йўналишлар бўйича меморандум лойиҳаси тайёрланиши ва тез орада имзолашга келишилди.