Навоий вилояти ёшлари ва мутахассислари учун онлайн семинар ташкил этилди

Бугун Давлат хизматини ривожлантириш агентлиги Навоий вилояти бошқармаси билан ҳамкорликда “Эл-юрт умиди” жамғармаси очиқ стипендия танловлари тартиби билан боғлиқ янгиликларни вилоят ёшлари ва мутахассислари орасида кенг тарғиб этишга қаратилган онлайн тарғибот семинари ўтказилди.

Мулоқот давомида семинар иштирокчиларига “Эл-юрт умиди” жамғармаси масъул ходимлари томонидан илғор хорижий давлатлар нуфузли университетлари ва илмий марказларида бакалавриат, магистратура ва докторантурада таълим олиш учун 500 ўринга мўлжалланган 2023 йилги 1-очиқ стипендия танлови тартиби тўғрисида тушунчалар берилди.

Мазкур семинарда 3 мингдан ортиқ Навоий вилоятининг давлат ташкилоти ходимлари ҳамда олий ўқув юртлари талабалари, Президент мактаблари, ихтисослаштирилган мактабларнинг ўқувчилари, мутахассислар ва ёшлар иштирок этдилар. Шунингдек, 10 га яқин ривожланган мамлакатларнинг нуфузли хорижий университетларида таълим олаётган, Навоийлик “Эл-юрт умиди” жамғармаси стипендиатлари иштирок этдилар.

Онлайн учрашувда, “Эл-юрт умиди” жамғармаси бўлим бошлиғи A. Aъзамхонов томонидан Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилинди.

Онлайн мулоқотда иштирок этган Навоий вилоятидан бўлган “Эл-юрт умиди” жамғармаси стипендиатлари томонидан Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар берилди.

Тақдимот қизғин савол-жавоблар ва муҳокамаларга бой тарзда ўтказилиб, вилоят ёшлари ва мутахассислар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар.

Эслатиб ўтамиз, бу каби онлайн семинар вилоятлар кесимида мунтазам ўтказиб борилмоқда. Онлайн семинарнинг 12 апрелдаги учрашуви Бухоро вилоятидаги идора, ташкилотларининг ходимлари, талабалар ва илмий изланувчилар ҳамда мактаб битирувчилари, вилоят ёшлари учун ўтказиш режалаштирилган.