“Эл-юрт умиди” жамғармасининг хорижда таълим олаётган 2023 йил охирига қадар ўқишини якунлаб республикамизга қайтиши кутилаётган стипендиатлари билан навбатдаги онлайн мулоқот бўлиб ўтди!

Жорий йилнинг 8 апрель куни “Эл-юрт умиди” жамғармаси ижрочи директори А.Бекмуродов, Давлат хизматини ривожлантириш агентлиги директорининг биринчи ўринбосари О.Хасанов ҳамда Жамғарма жамоаси, шунингдек, хорижий нуфузли университетларида таълим олаётган 150 га яқин Жамғарманинг стипендиатлари иштирокида ZOOM платформаси орқали онлайн мулоқот ўтказилди.

Мазкур онлайн мулоқотни ўтказишдан кўзланган мақсад – Жамғарма стипендиатлари билан доимий мулоқотни давом эттириш, стипендиатларда ватанпарварлик туйғусини ошириш, улар дуч келаётган муаммоларини ўрганиш ва ҳал қилишга кўмаклашиш, шунингдек, келажакдаги режаларини билиш, уларни ўқишларини тугатиб қайтганларидан сўнг вазирлик идора ва давлат ташкилотлари тизимида меҳнат фаолиятини бошлашлари учун шароитлар яратиш кўзда тутилган.

Маълумот учун: Жамғарма томонидан бугунги кунда АҚШ, Буюк Британия, Германия, Франция, Япония, Канада, Италия, Испания, Жанубий Корея каби ривожланган мамлакатларнинг глобал академик рейтингларда ТОП 300 таликка кирган University of Oxford, University of Cambridge, University College London, Imperial College London, Columbia University, Cornell University ва бошқа нуфузли университетларида мамлакатимиз учун устувор ҳисобланган мутахассисликлар бўйича 479 нафар стипендиатлар Жамғарма таълим дастурлари бўйича ўқишларини давом эттиришмоқда.

Онлайн мулоқот жараёнида А.Бекмуродов томонидан стипендиатлар учун яратиб берилаётган қўшимча имкониятлар, уларнинг замонавий билим ва кўникмаларни эгаллашлари учун давлатимиз раҳбари томонидан стипендиатларнинг хорижда таълим олиши учун давлат бюджетидан мунтазам ва барқарор маблағ ажратиб борилаётганлиги, улар мазкур имкониятдан фойдаланган ҳолда мамлакатимизни ривожланган давлатлар қаторига қўшиш учун хорижда олган билим ва тажрибаларини сафарбар этишлари лозимлиги таъкидланди.

Шунингдек, О.Хасанов томонидан ўқишини якунлаб мамлакатимизга қайтишни режалаштирган стипендиатлар учун давлат ташкилотларида муносиб иш ўринларини олдиндан аниқлаш, қайтиб келган стипендиатлар билан суҳбат қуриш ва уларни давлат хизматига жалб қилиш лозимлигини таъкидлаб ўтилди.

Бундан ташқари, Жамғарма стипендиатлари томонидан олиб борилаётган илмий тадқиқотларни бевосита мамлакатимизнинг турли соҳаларини ривожлантириш юзасидан мавзуларни танлашлари тавсия этилди. Ушбу таклиф стипендиатлар томонидан қўллаб-қувватланиб, илмий тадқиқотлар мавзуси тегишли бўлган вазирлик идоралари билан стипендиатларнинг ўзаро ҳамкорлигини ташкил этиш чораларини кўришга келишилди.

Стипендиатлар ўзи таълим олаётган хорижий университетларида Ўзбекистонинг ижобий имиджини янада ошириш юзасидан тақдимотлар, давра суҳбатларини ташкил этиш лозимлиги алоҳида таъкидлаб ўтилди.

Мулоқот давомида, Жамғарманинг хорижда таълим олаётган стипендиатлари ўзларининг соҳаларни ривожлантириш юзасидан таклифлари билан фаол иштирок этдилар. Онлайн мулоқот жараёни қизғин савол жавобларга бой тарзда бўлиб ўтди.

Учрашув якунида, Жамғарма стипендиатлари билан бу каби мулоқотлар доимий ўтказиб боришга ҳамда қайтиб келган стипендиатлар учун Давлат бошқаруви академиясида семинарлар ташкил этишга келишиб олинди.