“Эл-юрт умиди” жамғармаси, Давлат хизматини ривожлантириш агентлиги билан ҳамкорликда, Фарғона вилояти ёшлари ва мутахассислари учун онлайн семинар ўтказди!

Жорий йил 7 апрел куни Давлат хизматини ривожлантириш агентлиги Фарғона вилояти бошқармаси билан ҳамкорликда, “Эл-юрт умиди” жамғармасининг 2023 йилги 1-очиқ стипендия танлови тартиби билан боғлиқ янгиликларни вазирлик, идора, давлат ташкилотларининг Фарғона вилояти ҳудудидаги мутахассислар ва ёшлар орасида кенг тарғиб этишга қаратилган онлайн семинар бўлиб ўтди.

Семинарни ўтказишдан мақсад республика ҳудудларидан иқтидорли ва истиқболли ёш мутахассисларни излаб топиш ва танлашга қаратилган фаолиятни тубдан такомиллаштириш янада модернизациялаш, уларнинг хориждаги нуфузли таълим ва илмий муассасаларда, ишлаб чиқариш, инновацион ва бошқа компанияларда мақсадли таълим олишини ҳамда стажировкадан ўтишини ташкил этиш, профессионал, чуқур билимга эга, замонавий фикрлайдиган ва ватанпарварлик руҳида тарбияланган янги авлод кадрларини шакллантириш ва уларни давлат хизматига жалб этиш мақсадида ташкил этилди.

Мазкур семинарда 3000 мингдан ортиқ Фарғона вилоятининг давлат ташкилоти ва муассаса раҳбарлари, ходимлари ҳамда олий ўқув юртлари талабалари, Президент мактаблари, ихтисослаштирилган мактабларнинг ўқувчилари ва ёшлар иштирок этдилар. Шунингдек, 30 га яқин ривожланган мамлакатларнинг нуфузли хорижий рейтингларда юқори ўринларда турувчи олий таълим муассасаларида таҳсил олаётган, Фарғоналик 32 нафар “Эл-юрт умиди” жамғармаси стипендиатлари иштирок этдилар.

Онлайн учрашувни, “Эл-юрт умиди” жамғармаси ижрочи директор ўринбосари в.б. Ж. Ахмедов очиб берди ҳамда Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилди.

Онлайн мулоқотда иштирок этган Фарғона вилоятидан бўлган “Эл-юрт умиди” жамғармаси стипендиатлари томонидан Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар берилди.

Танловда ғолиб бўлган стипендиатларнинг хорижий университетларда таълим олишлари учун барча харажатлар Жамғарма томонидан қоплаб берилиши таъкидланди.

Тақдимот қизғин савол-жавоблар ва муҳокамаларга бой тарзда ўтказилиб, вилоят ёшлар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар.

Эслатиб ўтамиз, 10 апрель куни вазирлик, идора, давлат ташкилотларини Андижон вилояти ҳудудидаги ходимлари, ОТМлар талабалари ва илмий изланувчилари ҳамда мактаб битирувчилари ҳамда вилоят ёшлари ва мутахассислари учун ўтказиш режалаштирилган.