Русский
English
Жорий йил 6 апрел куни Давлат хизматини ривожлантириш агентлиги Наманган вилояти бошқармаси билан ҳамкорликда, “Эл-юрт умиди” жамғармасининг 2023 йилги 1-очиқ стипендия танлови тартиби билан боғлиқ янгиликларни вазирлик, идора, давлат ташкилотларининг Наманган вилояти ҳудудидаги ходимлари, ОТМлар талабалари ва илмий изланувчилар ҳамда мактаб битирувчилари, вилоят ёшлари, мутахассислари ва давлат хизматчилари орасида кенг тарғиб этишга қаратилган онлайн семинар бўлиб ўтди.
Семинарни ўтказишдан мақсад республика ҳудудларидан иқтидорли ва истиқболли ёш мутахассисларни излаб топиш ва танлашга қаратилган фаолиятни тубдан такомиллаштириш янада модернизациялаш, уларнинг хориждаги нуфузли таълим ва илмий муассасаларда, ишлаб чиқариш, инновацион ва бошқа компанияларда мақсадли таълим олишини ҳамда стажировкадан ўтишини ташкил этиш, профессионал, чуқур билимга эга, замонавий фикрлайдиган ва ватанпарварлик руҳида тарбияланган янги авлод кадрларини шакллантириш ва уларни давлат хизматига жалб этиш мақсадида ташкил этилди.
Мазкур семинарда 8000 минга яқин Наманган вилоятининг давлат ташкилоти ва муассаса раҳбарлари, ходимлари ҳамда олий ўқув юртлари талабалари, ихтисослаштирилган мактабларнинг ўқувчилари ва ёшлар иштирок этдилар. Шунингдек, 30 га яқин ривожланган мамлакатларнинг нуфузли хорижий рейтингларда юқори ўринларда турувчи олий таълим муассасаларида таҳсил олаётган, Наманганлик “Эл-юрт умиди” жамғармаси стипендиатлари иштирок этдилар.
Онлайн учрашувни, “Эл-юрт умиди” жамғармаси ижрочи директор ўринбосари в.б. Ж. Ахмедов очиб берди ҳамда Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилди.
Шу билан бирга, Жамғарманинг стипендиатлари сони 45 нафар жиҳатидан айнан Наманган вилояти Тошкент шаҳридан кейинги иккинчи ўринни эгаллаганлиги таъкидланди. Бу эса ўз навбатида Жамғарма танловларига бўлган қизиқиш ҳамда хорижий билим ва кўникмаларни ўзлаштиришга бўлган интилиш ушбу вилоятда юқори эканлигини англатиши айтиб ўтилди.
Онлайн мулоқотда иштирок этган Наманган вилоятидан бўлган “Эл-юрт умиди” жамғармаси стипендиатлари томонидан Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар берилди.
Тақдимот қизғин савол-жавоблар ва муҳокамаларга бой тарзда ўтказилиб, вилоят ёшлар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар.
Эслатиб ўтамиз, бу каби онлайн семинар вилоятлар кесимида мунтазам ўтказиб борилмоқда. Онлайн семинарларнинг жорий йил 7 апрелдаги учрашуви Фарғона вилоятидаги идора, ташкилотларининг ходимлари, талабалар ва илмий изланувчилар ҳамда мактаб битирувчилари, вилоят ёшлари ва мутахассислари учун ўтказиш режалаштирилган.