Русский
English
Жорий йил 5 апрел куни Давлат хизматини ривожлантириш агентлиги Хоразм вилояти бошқармаси билан ҳамкорликда, “Эл-юрт умиди” жамғармасининг 2023 йилги 1-очиқ стипендия танлови тартиби билан боғлиқ янгиликларни вазирлик, идора, давлат ташкилотларининг Хоразм вилояти ҳудудидаги ходимлари, ОТМлар талабалари ва илмий изланувчилар ҳамда мактаб битирувчилари, вилоят ёшлари орасида кенг тарғиб этишга қаратилган онлайн семинар бўлиб ўтди.
Семинарни ўтказишдан мақсад республика ҳудудларидан иқтидорли ва истиқболли ёш мутахассисларни излаб топиш ва танлашга қаратилган фаолиятни тубдан такомиллаштириш янада модернизациялаш, уларнинг хориждаги нуфузли таълим ва илмий муассасаларда, ишлаб чиқариш, инновацион ва бошқа компанияларда мақсадли таълим олишини ҳамда стажировкадан ўтишини ташкил этиш, профессионал, чуқур билимга эга, замонавий фикрлайдиган ва ватанпарварлик руҳида тарбияланган янги авлод кадрларини шакллантириш ва уларни давлат хизматига жалб этиш мақсадида ташкил этилди.
Мазкур семинарда 1000 дан ортиқ Хоразм вилоятининг давлат ташкилоти ва муассаса раҳбарлари, ходимлари ҳамда олий ўқув юртлари талабалари, Президент мактаблари, ихтисослаштирилган мактабларнинг ўқувчилари ва ёшлар иштирок этдилар. Шунингдек, 40 га яқин ривожланган мамлакатларнинг нуфузли хорижий рейтингларда юқори ўринларда турувчи олий таълим муассасаларида таҳсил олаётган, Хоразмлик “Эл-юрт умиди” жамғармаси стипендиатлари иштирок этдилар.
Онлайн учрашувни, “Эл-юрт умиди” жамғармаси ижрочи директор ўринбосари в.б. Ж. Ахмедов очиб берди ҳамда Жамғарма очиқ стипендия танловларини ўтказиш тартиби, ажратилган квоталар, устувор йўналишлар, танловни ташкил этиш механизми ҳамда электрон ҳужжат топшириш платформасининг ишлаш тартиби билан боғлиқ янгиликлар тўғрисида тақдимот қилди.
Онлайн мулоқотда иштирок этган Хоразмлик “Эл-юрт умиди” жамғармаси стипендиатлари томонидан Жамғарма танловлари ва нуфузли хорижий университетлардаги ўқиш имкониятлари тўғрисида семинар иштирокчиларига маълумотлар берилди. Хоразм ёшлари ва мутахассисларига "Эл-юрт умиди" жамғармаси фаолияти ҳамда хорижда таълим олиш ҳақида кенг маълумотлар тақдим этиш мақсадида стипендиатлар иштирокидаги телеграм гуруҳи ташкил этилди.
Танловда ғолиб бўлган стипендиатларнинг хорижий университетларда таълим олишлари учун барча харажатлар Жамғарма томонидан қоплаб берилиши таъкидланди.
Тақдимот қизғин савол-жавоблар ва муҳокамаларга бой тарзда ўтказилиб, вилоят ёшлар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар.
Эслатиб ўтамиз, бу каби онлайн семинар вилоятлар кесимида мунтазам ўтказиб борилмоқда. Онлайн семинарнинг 6 апрелдаги учрашуви Наманган вилоятидаги идора, ташкилотларининг ходимлари, талабалар ва илмий изланувчилар ҳамда мактаб битирувчилари, вилоят ёшлари учун ўтказиш режалаштирилган.