Русский
English
Жорий йилнинг 15 март куни Ўзбекистон Республикасининг Исроилдаги элчихонаси ташаббуси билан “Эл-юрт умиди” жамғармаси, Фанлар Академияси, Тошкент давлат транспорт университети, Тошкент ирригация ва қишлоқ хўжалиги институти, ТАТУ Қашқадарё филиали, ТАТУ Самарқанд филиали ва бошқа юртимизнинг қатор олий таълим муассасалари ҳамда Исроилнинг Қуддус Иброний университети, Исроил технология институти, Вейзман номидаги фан институти, Ротҳберг халқаро мактабларининг вакиллари ўртасида икки томонлама ҳамкорлик алоқаларини ўрнатиш масалалари муҳокамаси юзасидан онлайн учрашув бўлиб ўтди.
Онлайн учрашувда Исроилнинг нуфузли олий таълим муассасалари ҳақида университет вакилларининг тақдимотлари ўтказилди.
Маълумот учун: 1. Қуддус Иброний университети (Hebrew University of Jerusalem)
Дунёнинг энг яхши университетлари қаторидан жой олган Қуддус Иброний университети Исроилнинг энг йирик илмий ва тадқиқот университети ҳисобланади. Қуддус Иброний университети Исроил давлати ташкил этилишидан 30 йил олдин ташкил этилган. 1918 йилда Алберт Эйнштейн, Зигмунд Фрейд, Мартин Бубер ва Хаим Вейзманн томонидан асос солинган ҳамда университет 1925 йилда расман очилган.
Университет жаҳон университетларининг академик рейтингида (ARWU) 77-ўринни, QS халқаро университетлар рейтингида 222-ўринни,
US news рейтингида 241-ўринни, Times Higher Education рейтингида 250-300-ўринларни эгаллаган.
Шу билан бирга, университет мутахассислик рейтингларида (ARWU) жумладан, математика ва коммуникация бўйича 17-ўринни, ҳуқуқ бўйича
30-ўринни, давлат бошқаруви бўйича 48-ўринни, стоматология & оғзаки фан ҳамда сиёсатшунослик бўйича 51-75-ўринларни, иқтисодиёт ва социология бўйича 76-100-ўринларни эгаллаган.
Университетда ўқиш тўловлари бакалавр дастури бўйича 2 100 евродан 12 500 еврогача, магистратура дастури бўйича 3 090 евродан 19 000 еврогача, докторантура дастури бўйича 3 090 евродан 19 000 еврогача этиб кўрсатилган.
Қуддус Иброний университети бир қатор машҳур инсонларни етиштирган. Битирувчилар орасида Исроилнинг собиқ президенти Реувен Ривлин, бош вазирлар Эҳуд Барак, Эҳуд Олмерт, Нафтали Беннет, Роберт Ауманн иқтисод бўйича Нобел мукофоти совриндори мавжуд.
2. Технион - Исроил технология институти (Technion - Israel Institute of Technology)
Исроил давлатининг учинчи энг йирик Хайфа шаҳрида жойлашган Технион - Исроил технология институти энг қадимий ҳамда фан ва муҳандислик университетларидан биридир. 1924 йилдан бери фаолият юритаётган Технион - Исроил технология институти мамлакат инфратузилмасини ва юқори технологиялар саноатини барпо этишда катта муҳим рол ўйнаган.
Технион жаҳон университетларининг академик рейтингида (ARWU) 98-ўринни, мутахассислик рейтингида жумладан: аэрокосмик муҳандислиги бўйича 22-ўринни, телекоммуникация муҳандислиги бўйича 40-ўринни, автоматик бошқарув тизими бўйича 49-ўринни, Кимё ва транспорт фани ва технологияси бўйича 51-75-ўринларни ҳамда Математика мутахассислиги бўйича QS рейтингида 74-ўринни эгаллаган.
Технионда ўқиш тўловлари маҳаллий ва чет элликлар учун фарқ қилади. Исроил фуқаролари йилига 697 АҚШ доллари тўлайдилар, чет эллик талабалар эса камида 14 996 доллар сарфлайди.
Технион - Исроил технология институти бир қанча нобел мукофоти совриндорларини етиштирган. Профессор Алан Аспест ҳамда Профессор Антон Зайлингерлар физика бўйича Профессор Дан Шехтман, Профессор Аарон Сичановерлар Кимё бўйича Нобел мукофоти билан тақдирланган.
3. Вейзман номидаги фан институти (Weizmann Institute of Science)
Исроилнинг Реҳовот шаҳридаги Вейзман номидаги фан институти дунёдаги энг нуфузли кўп тармоқли тадқиқот муассасаларидан бири ҳисобланади. Табиий ва аниқ фанларни кенг кўламли тадқиқ этиши билан ажралиб турадиган институтда 2 500 нафар олимлар, талабалар, техниклар ва ёрдамчи ходимлар ишлайди. Институт тадқиқот ишлари касаллик ва очликка қарши курашнинг янги усулларини излаш, математика ва информатика фанининг етакчи саволларини ўрганиш, материя ва коинот физикасини ўрганиш, янги материаллар яратиш ва атроф-муҳитни муҳофаза қилишнинг янги стратегияларини ишлаб чиқишни ўз ичига олади.
Институт жаҳон университетларининг академик рейтингида (ARWU) 83-ўринни, мутахассислик рейтингида жумладан: Компьютер фанлари ва муҳандислик, материалшунослик ва муҳандислик, биология фанлари, инсон биологик фанлари бўйича 51-75 ўринларни, математика, физика ва кимё мутахассислиги бўйича 76-100 ўринларни эгаллаган.
Университет ўқиш тўловлари жумладан бакалавр дастури бўйича 2 100 евродан 12 500 еврогача, магистратура дастури бўйича 3 090 евродан
19 000 еврогача, докторантура дастури бўйича 3 090 евродан 19 000 еврогача этиб кўрсатилган.
Вейзман номидаги фан институтининг биомолекуляр тузилма ва йиғилиш маркази директори Профессор Ада Ёнат кимё бўйича Нобел мукофоти билан тақдирланган.
4. Ротҳберг халқаро мактаби (Rothberg International School)
Ротҳберг халқаро мактаби Қуддус Иброний университети қошидаги мактаб бўлиб, халқаро талабалар учун таълим олиш масканидир. Мактаб халқаро талабаларга бакалавриат, магистратура дастурлари, ёзги қисқа муддатли ўқув курслари, мустақил изланувчи тадқиқотчилар учун дастурлар таклиф этади. Мактаб ҳар йили 90 та давлатдан 2 500 га яқин талабаларни қабул қилади.
Мактаб бакалавриат дастури бўйича 5 690 доллардан 14 850 долларгача, Магистратура дастури бўйича 11 400 доллардан 15 260 долларгача, ёзги курслар ва қисқа муддатли курслар дастури бўйича 240 доллардан 3 330 долларгача этиб белгиланган.
Ротҳберг халқаро мактаби машҳур инсонларни етиштирган жумладан: америкалик журналист, CNN янгиликлар бошловчиси ва муаллифи Волф Блитзер, асли исроиллик америка актрисаси, олтин глобус мукофоти совриндори Натали Портман ва бошқалар.
Ўтказилган учрашувда Жамғарма ижрочи директор ўринбосари в.б. Ж. Ахмедов томонидан “Эл-юрт умиди” жамғармаси фаолияти ва танловлари таништириб ўтилди.
Бугунги кунда “Эл-юрт умиди” жамғармасидан бирорта стипендиат Исроилда таҳсил олмаётганлиги ваҳоланки, бу мамлакатнинг университетлари дунё рейтингларида юқори ўринларни эгаллаганлиги ва замонавий ва сифатли таълимга эга эканлиги Жамғарма ва Исроилнинг нуфузли университетлари ўртасидаги ўзаро ҳамкорликни яқиндан ташкил этишни тақозо этиши учрашувда таъкидланди.
Шундан сўнг савол-жавоблар қисмига ўтилди. Ўзбекистонлик талабалар, ёшлар, профессор-ўқитувчилар ва мутахассислар Исроилнинг мазкур университетларида таҳсил олиш имкониятлари, халқаро талабаларга университетларда ажратилган чегирмалар, тадқиқот ишларида ўзаро ҳамкорлик қилиш масалалари, манбалар ва адабиётлар алмашинувидаги ҳамкорликлар шу ва бошқа ўзларини қизиқтирган саволларга мутасаддилардан жавоб олдилар.
Онлайн мулоқот кўтаринки руҳда ўтказилиб, тадбирда қатнашган Исроил университетига оид тақдимотларни кенг тарғиб қилишга ва бу каби ҳамда ҳамкорликдаги семинарларни ташкил этишга келишиб олинди.