“Эл-юрт умиди” жамғармаси ва Буюк Британиянинг Рединг университети ҳамкорлик алоқаларининг истиқболини белгиловчи меморандум лойиҳасининг муҳокамаси бўлиб ўтди

Хабарингиз бор, 2022 йил 25 ноябрь санасида “Эл-юрт умиди” жамғармаси ва Буюк Британиянинг Рединг университети Халқаро қабул бўйича минтақавий раҳбари Danhua Wu иштирокида икки томонлама ҳамкорлик алоқаларини йўлга қўйиш масалалари муҳокамаси юзасидан учрашув ўтказилгани ҳақида эълон қилган эдик. Бугун ушбу учрашувларнинг иккинчи босқичи ўтказилди.

Жорий йилнинг 15 март куни “Эл-юрт умиди” жамғармасида ижрочи директор ўринбосари в.б. Ж.Aхмедов, Жамғарма бўлим бошлиқлари A.Хамдамов ва A.Aъзамхонов Буюк Британиянинг Рединг университетининг минтақавий катта менежери Ирем Озсой ва менежери Шаойинг Лу иштирокида икки томонлама ҳамкорлик алоқаларини белгиловчи меморандум лойиҳасининг онлайн муҳокама учрашуви бўлиб ўтди.

Маълумот учун: Рединг университети (University of Reading) 1892 йилда Оксфорд университетининг Рединг университети коллежи сифатида ташкил этилган. Университет ўзининг ёрқин тарихи, истиқболлари, илмий-тадқиқот марказлари ва ўзининг бетакрор яшил муҳити билан халқаро ҳамжамиятда катта нуфузга эга. Буюк Британиянинг “Яшил Университет” рейтингида “Яшил Байроқ” мукофоти билан тақдирланган.

Университетда 23000 дан ортиқ талабалар таҳсил олади. Рединг университети 2022 йилда халқаро QS рейтингида 202-ўринни эгаллаган. Бугунги кунда Жамғарманинг 17 нафар стипендиатлари мазкур университетда таҳсил олишади.

Учрашув давомида бугунги кунда мазкур университетда таълим олаётган 17 нафар Жамғарма стипендиатларини таълим олиш жараёнларида яқиндан ёрдам бериш, уларнинг яхши ўқишлари учун қўшимча шароитлар яратиш ҳамда келажакда Рединг университетида таҳсил олувчи Жамғарма стипендиатлари учун чегирмалар ажратиш, суғурта ва бошқа меморандумда кўрсатилган масалалар муҳокама қилинди.

Бундан ташқари вазирлик ва идораларнинг мақсадли буюртмаси асосида давлат хизматчиларини ушбу университетда қисқа муддатли малака ошириш ва стажировка ўтишини ташкил қилиш ҳамда республикамиздаги олий таълим муассасаларига университет профессор-ўқитувчиларини жалб этиш бўйича таклифлар ҳам муҳокама қилинди.

Ўз ўрнида мазкур таклифлар Рединг университети вакили томонидан қўллаб қувватланиб, ҳамкорлик алоқаларини янада ривожлантириш бўйича меморандум муҳокамаларининг якуний натижалари маълум қилиниб, томонлар тез фурсатда меморандумни имзолашга келишиб олдилар.