Русский
English
2023 йилнинг 14 март куни “Эл-юрт умиди” жамғармаси ижрочи директор ўринбосари в.б. Ж.Aхмедов, Жамғарма бўлим бошлиқлари A.Хамдамов ва A.Aъзамхонов ҳамда Миннесота университетининг Халқаро талабалар ва ҳомийлик асосидаги таълим дастурлари бўйича директори Сара Круигер ўртасида икки томонлама ҳамкорлик алоқаларини ўрнатиш масалалари муҳокамаси юзасидан Жамғармада учрашув бўлиб ўтди.
Маълумот учун: Миннесота университети АҚШдаги нуфузли давлат грант тадқиқот университетидир. Миннесота университети 54,955 талаба таълим олади Америка Қўшма Штатлардаги тўққизинчи йирик университет ҳисобланади. Миннесота университетида 19 та коллежлари мавжуд. Мазкур университет халқаро миқёсда эътироф этилган академик рейтингларда жумладан, QS-185 ўрин, THE-86 ўрин, The U. S. News and World Report- 55 ўрин ва ARWU -40 ўринлардан жой олган нуфузли университет саналади. Бугунги кунда ушбу университетда 3 нафар “Эл-юрт умиди” жамғармаси стипендиатлари таҳсил олмоқда.
Мазкур учрашувда, Ж. Ахмедов томонидан Сара Круигерга “Эл-юрт умиди” жамғармаси фаолияти таълим дастурлари ва стипендия танловлари юзасидан батафсил маълумот берилди.
Ўтказилган музокаралар чоғида Жамғарма орқали университетда таълим олишни режалаштираётган ҳар бир стипендиатларнинг ўқиш харажатларидан 25-30 фоиз чегирмалар ажратиш имкониятлари бўйича таклифлар киритилди. Ушбу таклифга жавобан Сара Круигер Миннесота университети Жамғарма стипендиатлари учун сўралган чегирмаларни ажратишга тайёр эканлигини ва бу ўзаро алоқаларни янада мустаҳкамлашга хизмат қилишини таъкидлади.
Бундан ташқари, Сара Круигер Жамғарма танловлари ғолиб бўлиб, танлаган университетини ўзгартирмоқчи бўлган стипендиатларга Миннесота университети томонидан қисқа вақт оралиғида қабул хатларини олишда амалий ёрдам беришга тайёрлигини маълум қилди.
Шу билан бирга, вазирлик ва идораларнинг мақсадли буюртмаси асосида давлат хизматчиларини Миннесота университетида қисқа муддатли малака ошириш ва стажировка ўтишини ташкил бўйича таклифлар муҳокама қилинди. Ўз ўрнида мазкур таклифлар Сара Круигер томонидан қўллаб қувватланиб, мазкур йўналишларда ҳамкорлик алоқаларини ўрнатишга келишиб олинди.
Суҳбат жараёнида Сара Круигер бугунги кунда Ўзбекистон ва АҚШ ўртасидаги ҳар томонлама алоқаларининг ижобий ривож топаётганлигини таъкидлаб, берилган таклифлар юзасидан Жамғарма билан ҳамкорликда ишлашга тайёрлигини маълум қилди.
Мазкур учрашув якуни бўйича томонлар ҳамкорлик алоқаларини истиқболини белгиловчи юқоридаги таклифларни ўз ичига олган икки томонлама меморандум лойиҳасини ишлаб чиқиш ва май ойида имзолашга тайёрлаш, шунингдек, мазкур меморандум орқали стипендиатлар ўқув тўловларидан чегирмалар ажратиш ҳамда ҳамкорликда семинарлар ташкил этишга келишиб олинди.
Учрашув якунида томонлар Миннесота университетида ўқиш истагида бўлган республикамиздаги талабалар, ўқувчилар, вазирлик ва идора мутахассислари, тадқиқотчилар ва ёшлар учун жорий йилнинг 16 март куни Тошкент вақти билан соат 11:00 да ZOOM платформаси орқали онлайн вебинар ўтказишга келишиб олдилар.