“Эл-юрт умиди” жамғармаси вакиллари билан “Education Malaysia Global Services” раҳбарияти ўртасида учрашув бўлиб ўтди!

Жорий йилнинг 10 март куни “Эл-юрт умиди” жамғармасида ижрочи директор ўринбосари в.б. Ж.Ахмедов, Жамғарма бўлим бошлиғи А. Хамдамов ва бош мутахассиси М. Хошимов ҳамда Малайзия олий таълим вазирлиги ҳузуридаги Малайзия глобал таълим хизматлари агентлигининг (Education Malaysia Global Services) раиси Абдул Разак Ахмад, Корпоратив алоқалар бўлими бошлиғи Азҳар бин Моҳамед, Халқаро ҳамкорлик бўлими бошлиғи Саид Моҳсен Алкафф иштирокида икки томонлама ҳамкорлик алоқаларини ўрнатиш масалалари муҳокамаси юзасидан учрашув бўлиб ўтди.

Маълумот учун: Малайзия глобал таълим хизматлари агентлиги хорижий мамлакатларда Малайзия таълим тизимини тарғиб этиш ҳамда мамлакатлар ўртасида талабаларнинг алмашинув дастурларини амалга ошириш, қўшма таълим дастурларини йўлга қўйишга кўмаклашиш билан шуғулланади. Мазкур ташкилот Малайзия Олий таълим вазирлиги қошида 2012 йилда ташкил этилган.

Учрашувда, “Эл-юрт умиди” жамғармаси ва Малайзия Олий таълим вазирлиги ҳузуридаги Малайзия глобал таълим хизматлари агентлиги ўртасида ҳамкорлик алоқаларини ўрнатиш, шунингдек, Агентлик кўмагида Жамғарманинг Малайзия олий таълим муассасалари билан ўзаро манфаатли ҳамкорлик алоқаларини ривожлантириш, нуфузли Малайзия университетларида қисқа муддатли малака ошириш ва стажировка курсларини ташкил этишда ҳамкорлик қилиш масалалари муҳокама қилинди.

Музокаралар давомида томонлар ҳамкорликнинг истиқболлари келажакда Жамғарма стипендиатлари Малайзиянинг нуфузли университетларида таълим олиш имкониятлари, Малайзия томонидан Жамғарма учун ажратиладиган алоҳида грантлар, Жамғарманинг таълим дастурларини молиялаштириш харажатлари ва бошқа чегирмалар берилиш масаласи муҳокама қилинди.

Шунингдек, ҳамкорлик доирасида Ўзбекистонлик ёшлар ва мутахассисларни Малайзия Олий таълим муассасаларида ўқиши учун қўшимча имкониятлар яратиш, Малайзиянинг нуфузли университет ва компанияларида вазирлик ва идораларнинг мақсадли буюртмаси асосида давлат хизматчиларини қисқа муддатли малака ошириш ва стажировка ўтиш дастурларини ташкил этиш каби масалалар муҳокама қилинди.

Мазкур учрашув якунида томонлар ҳамкорлик алоқаларини истиқболини белгиловчи юқоридаги таклифларни ўз ичига олган икки томонлама меморандум имзолашга ҳамда ҳамкорликда ташрифларни амалга оширишга келишиб олинди.