Русский
English
Жорий йилнинг 23 февраль куни “Эл-юрт умиди” жамғармаси вакиллари ҳамда Буюк Британиянинг нуфузли университетлардан бири ҳисобланган Йорк университети (University of York) халқаро қабул бўйича раҳбари Никола Мей билан ҳамкорликда “Йорк университетида таълим олиш имкониятлари” мавзусида ZOOM платформаси орқали вебинар бўлиб ўтди.
Маълумот учун: Йорк университети 1963 йил ташкил этилган бўлиб, бу давр мобайнида университет 100 дан ортиқ касбий йўналишлар бўйича битирувчиларни тайёрламоқда. Йорк университети Буюк Британияда жойлашган йирик олий таълим муассасаси бўлиб, QS халқаро миқёсда эътироф этилган академик рейтингида 162 ўринда туради. Бирлашган Қиролликда эса етакчи 10 университетининг бири ҳисобланади.
Онлайн вебинарда 300 га яқин иштирокчилар, жумладан, вазирлик, идораларнинг масъул ходимлари, профессор-ўқитувчилар, мутахассислар, талабалар, ёшлар ва бошқа қизиқувчилар иштирок этди.
Никола Мей онлайн мулоқот қатнашчиларига Йорк университети фаолиятини ўзининг тақдимоти орқали таништирди. Шунингдек, бакалавриат, магистратура ва докторантура дастурлари, университетда ўқиш учун халқаро номзодларга қўйилган талаблар, хорижий талабаларга ажратиладиган грантлар ва бошқа маълумот бериб ўтилди.
Шунингдек, вебинарда Йорк университетининг битирувчиси, “Эл-юрт умиди” жамғармаси стипендиати Диёрбек ҳам иштирок этди ва Йорк университети томонидан халқаро талабалар учун яратиб берилган имкониятлар, яшаш ва таълим олиш шароитлари ҳамда ўзининг ўқиш даври хотираларини онлайн учрашув қатнашчиларига тақдимоти орқали таништирди.
Мулоқот очиқ кўтаринки руҳда ўтказилиб, вебинар иштирокчилари ўзларини қизиқтирган саволларга Никола Мей томонидан малакали жавоб олдилар.
Жамғарма раҳбарияти томонидан вебинар иштирокчиларига республикамиздаги олий таълим муассасалари билан Йорк университети ўртасида ҳамкорлик алоқаларини ўрнатишга кўмаклашиш ва бу каби онлайн вебинарларни доимий ўтказиб борилиши таъкидлаб ўтилди.